‘ജീവിതത്തിന് ഇത് പുതിയ തുടക്കം’; തങ്ങള്‍ ഒരുമിക്കുന്നുവെന്ന് വിഷ്ണു വിശാലും ജ്വാല ഗുട്ടയും

തമിഴ് നടന്‍ വിഷ്ണു വിശാലും ബാഡ്മിന്റണ്‍ താരം ജ്വാല ഗുട്ടയും വിവാഹിതരാകുന്നു. ഇരുവരും ട്വിറ്ററിലൂടെയാണ് പുതിയ ജീവിതം തുടങ്ങുന്നതായി അറിയിച്ചത്. ജ്വാലയുടെ ജന്മദിനത്തിലാണ് ഇരുവരും വിവാഹിതരാകാനുള്ള തീരുമാനമെടുത്തത്.”ജന്മദിനാശംസകള്‍ ജ്വാല, ജീവിതത്തിന് ഒരു പുതിയ തുടക്കം. പോസിറ്റീവായിരിക്കാം, നല്ലൊരു ഭാവിക്കായി ഒന്നിച്ച് പ്രവര്‍ത്തിക്കാം. നമുക്കും ആര്യനും, നമ്മുടെ കുടുംബത്തിനും സുഹൃത്തുക്കള്‍ക്കും ചുറ്റുമുള്ളവര്‍ക്കുമായി… എല്ലാവരുടെയും അനുഗ്രഹം വേണം” എന്ന് വിഷ്ണു ട്വിറ്ററില്‍ കുറിച്ചു. ജ്വാലയുടെ കൈയില്‍ അണിയിച്ച വിവാഹ മോതിരവും ചിത്രത്തില്‍ കാണാം.

വിഷ്ണുവിന്റെ രണ്ടാം വിവാഹമാണിത്.രാക്ഷസന്‍ തിയേറ്ററുകളില്‍ നിറഞ്ഞ കൈയടി നേടി മുന്നേറുമ്പോഴാണ് വിഷ്ണു വിശാല്‍ വിവാഹമോചിതനാകുന്ന വിവരം അറിയിച്ചത്. തുടര്‍ന്ന് താരം അമല പോളുമായി പ്രണയത്തിലാണെന്ന തരത്തില്‍ വാര്‍ത്തകള്‍ വന്നിരുന്നു. എന്നാല്‍ വിഷ്ണു അത് നിഷേധിക്കുകയും ജ്വാലയുമായുള്ള ചിത്രങ്ങള്‍ പിന്നീട് പങ്കുവെയ്ക്കുകയുമായിരുന്നു.