അബുദാബി കിരീടാവകാശിക്കും ഇസ്രയേല്‍ പ്രധാനമന്ത്രിക്കും നൊബേല്‍ സമ്മാനത്തിന് നാമനിര്‍ദേശം

ദുബായ്: അബുദാബി കിരീടാവകാശിയും യുഎഇ സായുധ സേനയുടെ ഉപ സര്‍വസൈന്യാധിപനുമായ ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍, ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു എന്നിവരെ സമാധാന നൊബേല്‍ സമ്മാനത്തിന് നാമനിര്‍ദേശം ചെയ്തു. യുഎഇയും ഇസ്രയേലും തമ്മില്‍ ചരിത്രപരമായ സമാധാന ഉടമ്പടിയിലേര്‍പ്പെട്ടതിനാണ് നാമനിര്‍ദേശം.

സമാധാന നൊബേല്‍ ജേതാവ് ഡേവിഡ് ട്രിംബിള്‍ ഷെയ്ഖ് മുഹമ്മദിന്റെയും നെതന്യാഹുവിന്റെയും പേരുകള്‍ നൊബേല്‍ കമ്മിറ്റിക്ക് സമര്‍പ്പിച്ചതായി ഇസ്രയേലി പ്രധാനമന്ത്രിയുടെ ഓഫീസ് പ്രസ്താവനയിലൂടെ അറിയിച്ചു. നോര്‍തേണ്‍ അയര്‍ലന്‍ഡിന്റെ ആദ്യ മന്ത്രി ട്രിംബിള്‍ നോര്‍തേണ്‍ അയര്‍ലന്‍ഡിന്റെ പ്രശ്‌നം സമാധാനപരമായി പരിഹരിച്ചതിനാണ് 1998 ല്‍ നൊബേല്‍ നേടിയത്. മധ്യപൂര്‍വദേശത്തെ സമാധാന നീക്കത്തിന് പിന്നില്‍ പ്രവര്‍ത്തിച്ചതിന് യുഎസ് പ്രസിഡന്റ് ഡോണാള്‍ഡ് ട്രംപിനെ ഇപ്രാവശ്യത്തെ നൊബേല്‍ സമാധാന സമ്മാനത്തിന് നാമനിര്‍ദേശം ചെയ്തിരുന്നു.

മധ്യപൂര്‍വദേശത്തു സമാധാനത്തിന്റെ പുതിയ പുലരിയെന്ന പ്രഖ്യാപനത്തോടെ സെപ്റ്റംബറില്‍ വൈറ്റ്ഹൗസില്‍ നടന്ന ചടങ്ങിലാണ് ഇസ്രയേലുമായി യുഎഇ സമാധാനക്കരാര്‍ ഒപ്പിട്ടത്. ഡോണള്‍ഡ് ട്രംപ് മധ്യസ്ഥത വഹിച്ചു. അറബ് -ഇസ്രയേല്‍ സംഘര്‍ഷം അവസാനിപ്പിക്കാന്‍ സഹായിക്കുന്നതും സാമ്പത്തികപുരോഗതി ഉണ്ടാക്കുന്നതുമാണു പുതിയ സമാധാനക്കരാറുകളെന്ന് ബെന്യാമിന്‍ നെതന്യാഹു പറഞ്ഞു.

യുഎഇ വിദേശകാര്യമന്ത്രി ഷെയ്ഖ് അബ്ദുല്ല ബിന്‍ സായിദ് അല്‍ നഹ്യാനും ബഹ്‌റൈന്‍ വിദേശകാര്യ മന്ത്രി അബ്ദുല്‍ലത്തീഫ് അല്‍ സയാനിയുമാണ് പ്രതിനിധികളായി കരാറുകളില്‍ ഒപ്പിട്ടത്.