കോവിഡ് സാന്ദ്രതാ പഠനത്തിനൊരുങ്ങി ആരോഗ്യവകുപ്പ്

തിരുവനന്തപുരം: കോവിഡ് രണ്ടാംഘട്ട വ്യാപനത്തിനെതിരെ മുന്നൊരുക്കവുമായി സംസ്ഥാനത്ത് കോവിഡ് സാന്ദ്രതാ പഠനം നടത്തുന്നു. രണ്ടാംഘട്ട വ്യാപനത്തിന്റെ സാധ്യതകള്‍ കണ്ടെത്തുന്നതിനും അനുയോജ്യമായ പ്രതിരോധ തന്ത്രങ്ങള്‍ ആവിഷ്‌കരിക്കുന്നതിനുമാണ് സാന്ദ്രതാ പഠനം നടത്തുന്നതെന്ന് ആരോഗ്യമന്ത്രി കെ.കെ ശൈലജ പറഞ്ഞു. സാര്‍സ് കോവിഡ് 2 ആന്റിബോഡിയുടെ സാന്നിധ്യം എത്രത്തോളം ആളുകളില്‍ പ്രത്യേകിച്ച് അപകട സാധ്യത കൂടുതലുളള ആളുകളിലുണ്ട് എന്ന മനസ്സിലാക്കുകയാണ് സാന്ദ്രതാ പഠനത്തിന്റെ പ്രധാന ലക്ഷ്യം. കോവിഡിനെതിരെ മുന്‍നിരയില്‍ നിന്ന് പ്രവര്‍ത്തിക്കുന്നവരിലടക്കം ആന്റിബോഡി അറിയലാണ് ലക്ഷ്യം.

ഇതിനായി ഓരോ ജില്ലകളില്‍ നിന്നും 350 വീതം പരുടെയെങ്കിലും സാമ്പിള്‍ ആരോഗ്യവകുപ്പ് ശേഖരിക്കും. 18 വയസിന് മുകളിലുളള 12,100 പേരെ പരിശോധിക്കാനാണ് തീരുമാനം. ആരോഗ്യ വകുപ്പ് അഡീഷണല്‍ ഡയറക്ടറുടെയും തിരുവനന്തപുരം മെഡിക്കല്‍ കോളേജിലെ പിഇഐഡി സെല്‍ നോഡല്‍ ഓഫീസറുടെയും മേല്‍നോട്ടത്തിലാണ് ഈ പഠനം നടത്തുന്നത്. നേരത്തെ കോവിഡ് നിശബ്ദ വ്യാപനം പഠിക്കാന്‍ ഐസിഎംആര്‍ ഇടപെട്ട് നടത്തിയ ആന്റിബോഡി പരിശോധനകളില്‍ ആന്റിബോഡി സാന്നിധ്യം വളരെ കുറച്ചു പേരിലാണ് കണണ്ടെത്തിയത്.