വിജയം എറിഞ്ഞുപിടിച്ച് ഡൽഹി; രാജസ്ഥാനെതിരെ 13 റൺസ് ജയം

ഐ പി എല്ലിൽ ബൗളർമാരുടെ മികവിൽ ഡൽഹി ക്യാപ്പിറ്റൽസിന് വിജയം. രാജസ്ഥാൻ റോയൽസിനെ 13 റൺസിനാണ് പരാജയപ്പെടുത്തിയത്. ഒരു ഘട്ടത്തിൽ അനായാസ വിജയത്തിലേയ്ക്ക് നീങ്ങിയ രാജസ്ഥാനെ ബൗളിംഗ് മികവിലാണ് ഡൽഹി പിടിച്ചുകെട്ടിയത്.

സ്കോർ:
ഡൽഹി 161/7(20)
രാജസ്ഥാൻ 148/8(20)

ആദ്യം ബാറ്റ് ചെയ്യാനിറങ്ങിയ ഡൽഹി തകർച്ചയോടെയാണ് തുടങ്ങിയത്. ആദ്യ പന്തിൽ തന്നെ പൃഥ്വി ഷായെ, ജോഫ്ര ആർച്ചർ മടക്കി. അജിൻക്യ രഹാനെയും പെട്ടെന്ന് മടങ്ങി. പിന്നീട് ഒത്തുചേർന്ന ധവാൻ- ശ്രേയസ് കൂട്ടുകെട്ടാണ് ഡൽഹി ഇന്നിംഗ്സിൻ്റെ നട്ടെല്ലായത്. ധവാൻ 33 പന്തിൽ 57 ഉം അയ്യർ 43 പന്തിൽ 53 ഉം റൺസെടുത്തു. രാജസ്ഥാന് വേണ്ടി ആർച്ചർ മൂന്നും ഉനദ്കട്ട് രണ്ടും വിക്കറ്റെടുത്തു.

താരതമ്യേന കുറഞ്ഞ വിജയലക്ഷ്യം തേടിയിറങ്ങിയ രാജസ്ഥാന് വേണ്ടി ജോസ് ബട്ലർ വെടിക്കെട്ട് തുടക്കമാണ് നൽകിയത്. ഒമ്പത് ബോളിൽ 32 റൺസെടുത്ത് ബട്ലർ പുറത്തായതോടെ സ്കോറിംഗിന് വേഗം കുറഞ്ഞു. സ്മിത്തും പെട്ടെന്ന് മടങ്ങി. ഇതിനിടെ ഡൽഹി ക്യാപ്റ്റൻ അയ്യർ പരിക്കേറ്റ് പുറത്തു പോയത് ഡൽഹിക്ക് തിരിച്ചടിയായി. അനായാസ വിജയത്തിലേയ്ക്ക് നീങ്ങുകയായിരുന്നു രാജസ്ഥാൻ. എന്നാൽ ബെൻ സ്റ്റോക്സ്(41),സഞ്ജു(25), ഉത്തപ്പ(32) എന്നിവരെ പുറത്താക്കി ഡൽഹി ബൗളർമാർ രാജസ്ഥാനെ സമ്മർദ്ദത്തിലാക്കി. കൂറ്റനടിക്കാരൻ ടിവാറ്റിയ ക്രീസിലുണ്ടായിരുന്നത് മാത്രമായിരുന്നു രാജസ്ഥാൻ്റെ പ്രതീക്ഷ. അവസാന രണ്ട് ഓവറിൽ 25 റൺസാണ് ജയിക്കാൻ വേണ്ടിയിരുന്നത്. 19-ാം ഓവറിൽ മൂന്ന് റൺസ് മാത്രമാണ് റബാഡ വിട്ടുകൊടുത്തത്. അവസാനഓവറിൽ ജയിക്കാൻ 22 റൺസ് വേണ്ടിയിരുന്നെങ്കിലും എട്ട് റൺസ് മാത്രമേ രാജസ്ഥാന് എടുക്കാനായുള്ളൂ. ഡൽഹിക്കായി നോർജെ,തുഷാർ എന്നിവർ രണ്ട് വിക്കറ്റ് വീതം വീഴ്ത്തി.