ദുബായ് – ഡെല്‍ഹി യാത്രക്കാരനില്‍ നിന്നും തോക്ക് പിടികൂടി

ഡെല്‍ഹി കസ്റ്റംസാണ് യുഎഇയില്‍ നിന്നെത്തിയ യാത്രക്കാരനില്‍ നിന്ന് തോക്ക കണ്ടെടുത്തത്.

ദുബായ്  : ഫ്‌ളൈ ദുബായ് വിമാനത്തില്‍ ദുബായ് വിമാനത്താവളത്തില്‍ നിന്നും ഡെല്‍ഹിയിലെത്തിയ യാത്രക്കാരനില്‍ നിന്നും കസ്റ്റംസ് ഉദ്യോഗസ്ഥര്‍ തോക്ക് കണ്ടെടുത്തു.

ഫെബ്രുവരി ഒന്നിന് ദുബായില്‍ നിന്നും ഡെല്‍ഹി ഇന്ദിരാഗാന്ധി രാജ്യാന്തര വിമാനത്താവളത്തില്‍ എത്തിയ യാത്രക്കാരനില്‍ നിന്നും ചെറിയ ഒരു റിവോള്‍വര്‍ കണ്ടെടുത്തതായി ഡെല്‍ഹി കസ്റ്റ്ംസാണ് അറിയിച്ചത്.

സംഭവത്തെ കുറിച്ച് വിശദമായ അന്വേഷണം നടത്തിവരികയാണെന്ന് കസ്റ്റംസ് അധികൃതര്‍ അറിയിച്ചു. റിവോള്‍വറും അതിനൊപ്പം  വെടിയുണ്ട നിറയ്ക്കുന്ന രണ്ട് അറകളും
പിടിച്ചെടുത്തിട്ടുണ്ട്.

സംഭവത്തെ ഗൗരവമായാണ് കാണുന്നതെന്നും എങ്ങിനെയാണ് യാത്രക്കാരന്റെ കൈയ്യില്‍ റിവോള്‍വര്‍ ഒളിപ്പിച്ചതെന്ന് ദുബായ് വിമാനത്താവള സുരക്ഷാ ഉദ്യോഗസ്ഥരുമായി സംയുക്ത അന്വേഷണം നടത്തുമെന്നും ഫ്‌ളൈ ദുബായ് അധികൃതരും അറിയിച്ചു.

ദുബായിയിലെ കര്‍ശന സുരക്ഷാ സംവിധാനങ്ങളെ മറികടന്ന് തോക്ക് കടത്തിയത് അത്യപൂര്‍വ്വ സംഭവമാണെന്ന് കസ്റ്റംസ് അധികൃതരും പറയുന്നു. തോക്ക് കടത്തിയയാളുടെ കൂടുതല്‍ വിവരങ്ങള്‍ പുറത്തു വിട്ടിട്ടില്ല.