തിരുവനന്തപുരം: ബംഗാള് ഉള്ക്കടലില് രൂപംകൊണ്ട ന്യൂനമര്ദം ചുഴലിക്കാറ്റായി മാറിയേക്കുമെന്ന കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിന്റെ പശ്ചാത്തലത്തില് ജില്ലയില് അടിയന്തര ദുരന്ത നിവാരണ പ്രവര്ത്തനങ്ങള് തുടങ്ങി. മുന്നൊരുക്കങ്ങള് പൂര്ത്തിയാക്കി തിരുവന്തപുരത്തെ ജില്ലയിലെ എല്ലാ ദുരന്ത നിവാരണ വിഭാഗങ്ങളും പൂര്ണ പ്രവര്ത്തന സജ്ജമായി. അടിയന്തര സാഹചര്യമുണ്ടായാല് നേരിടാന് കര, നാവിക, വ്യോമ സേനകളുടേയും ദേശീയ ദുരന്ത നിവാരണ സേനയുടേയും സഹായം ഉറപ്പാക്കിയിട്ടുണ്ടെന്ന് ജില്ലാ കളക്ടര് ഡോ. നവ്ജ്യോത് ഖോസ പറഞ്ഞു. മുന്നൊരുക്കങ്ങളുമായി ബന്ധപ്പെട്ട് കളക്ടറുടെ നേതൃത്വത്തില് കളക്ടറേറ്റ് കോണ്ഫറന്സ് ഹാളില് ജില്ലാ ദുരന്ത നിവാരണ അതോറിറ്റി യോഗം ചേര്ന്നു.
ജില്ലയില് ഡിസംബര് മൂന്നിന് അതിതീവ്ര മഴയുണ്ടാകുമെന്ന മുന്നറിയിപ്പിന്റെ പശ്ചാത്തലത്തില് റെഡ് അലേര്ട്ട് പ്രഖ്യാപിച്ചിരിക്കുകയാണ്. രണ്ടിനും നാലിനും ഓറഞ്ച് അലേര്ട്ടും പ്രഖ്യാപിച്ചിട്ടുണ്ട്. ചുഴലിക്കാറ്റിന്റെ പശ്ചാത്തലത്തില് കടല് അതിപ്രക്ഷുബ്ധമാകാന് സാധ്യതയുള്ളതിനാല് ജില്ലയുടെ തീരപ്രദേശങ്ങളില് നിന്ന് കടലില് പോകുന്നതിന് പൂര്ണ നിരോധനം ഏര്പ്പെടുത്തിയതായി ജില്ലാ കളക്ടര് അറിയിച്ചു. നിലവില് മത്സ്യബന്ധനത്തിനു പോയിട്ടുള്ളവര് ഏറ്റവും അടുത്തുള്ള സുരക്ഷിത തീരത്ത് എത്തണമെന്നും കളക്ടര് പറഞ്ഞു.
അതിതീവ്ര മഴയുണ്ടാകുമെന്ന കാലാവസ്ഥാ പ്രവചനത്തിന്റെ പശ്ചാത്തലത്തില് ജില്ലയിലെ പ്രധാന അണക്കെട്ടുകളില് നിന്നു പരമാവധി ജലം തുറന്നുവിടാന് ജില്ലാ കളക്ടര് നിര്ദേശം നല്കി. ആവശ്യമായ മുന്നറിയിപ്പുകള് നല്കിയാകണം ഡാമുകള് തുറക്കേണ്ടത്. രാത്രി ഡാം തുറക്കേണ്ട സാഹചര്യം പരമാവധി ഒഴിവാക്കണമെന്നും കളക്ടര് പറഞ്ഞു. ചുഴലിക്കാറ്റിന്റെ പശ്ചാത്തലത്തില് ജില്ലയിലെ 48 വില്ലേജുകളില് പ്രത്യേക ശ്രദ്ധ നല്കാന് പോലീസ്, തദ്ദേശ സ്വയംഭരണ അധികൃതര്ക്കു നിര്ദേശം നല്കി.
അടിയന്തര സാഹചര്യമുണ്ടായാല് ആളുകളെ ഒഴിപ്പിക്കാന് റവന്യൂ – തദ്ദേശ സ്വയംഭരണ വകുപ്പുകള് ഒരുക്കം തുടങ്ങി. ദുരിതാശ്വാസ ക്യാംപുകള് ആരംഭിക്കേണ്ട സ്ഥലങ്ങളുടേയും സ്ഥാപനങ്ങളുടേയും വിശദമായ പട്ടിക തയാറാക്കുകയും ചെയ്തു. തദ്ദേശ തെരഞ്ഞെടുപ്പിന്റെ പശ്ചാത്തലത്തില് വോട്ടെടുപ്പ് കേന്ദ്രങ്ങളായി നിശ്ചയിച്ചിരിക്കുന്ന സ്ഥാപനങ്ങള് ഒഴിവാക്കിയാണ് ദുരിതാശ്വാസ ക്യാംപുകളുടെ പട്ടിക തയാറാക്കിയിരിക്കുന്നത്. ക്യാംപുകള് തുറക്കേണ്ടിവന്നാല് ഇവിടങ്ങളില് വൈദ്യുതിയും വെള്ളവും ഭക്ഷണ സാധനങ്ങളുമെത്തിക്കാന് കെ.എസ്.ഇ.ബി, വാട്ടര് അതോറിറ്റി, സിവില് സപ്ലൈസ് വകുപ്പുകള്ക്കു നിര്ദേശവും നല്കി.
അതിതീവ്ര മഴയുടെ പശ്ചാത്തലത്തില് വെള്ളപ്പൊക്ക സാധ്യത മുന്നില്ക്കണ്ട് ജില്ലയിലെ പ്രധാന നദികളിലെ ജലനിരപ്പ് അപ്പപ്പോള് നിരീക്ഷണ വിധേയമാക്കാന് കളക്ടര് ഹൈഡ്രോളജി വകുപ്പിന് നിര്ദേശം നല്കി. നിലവില് രാവിലെ എട്ടിനും ഉച്ചയ്ക്കു 12നും വൈകിട്ട് നാലിനുമാണ് നദികളിലെ ജലനിരപ്പ് പരിശോധിക്കുന്നത്. വരുന്ന മൂന്നു ദിവസങ്ങളില് വൈകിട്ട് ആറിനും എട്ടിനും കൂടി പരിശോധിക്കും. നെയ്യാര്, കിള്ളിയാര്, കരമനയാര് എന്നിവിടങ്ങളിലെ ജലനിരപ്പാകും ഈ രീതിയില് പരിശോധിക്കുക.
വെള്ളക്കെട്ട് നിവാരണത്തിന് ഇറിഗേഷന് വകുപ്പിന്റെ വെള്ളായണി മധുപാലം പമ്പ് ഹൗസിലെ അഞ്ചു മോട്ടോറുകള് പൂര്ണ പ്രവര്ത്തനക്ഷമമാക്കി. പൂവാര്, വേളി പൊഴികളുടെ കടലിലേക്കുള്ള ഒഴുക്ക് കൂടുതല് സുഗമമാക്കും. മൈനര് ഇറിഗേഷന് വകുപ്പിന്റെ നിയന്ത്രണത്തിലുള്ള കനാലുകള് വൃത്തിയാക്കുന്ന നടപടികള് അടിയന്തരമായി പൂര്ത്തിയാക്കുന്നതിനും നിര്ദേശം നല്കി.
കളക്ടറേറ്റ് കോണ്ഫറന്സ് ഹാളില് ചേര്ന്ന ജില്ലാ ദുരന്ത നിവാരണ അതോറിറ്റി യോഗത്തില് ജില്ലാ കളക്ടര് ഡോ. നവ്ജ്യോത് ഖോസ, എ.ഡി.എം. വി.ആര്. വിനോദ്, ജില്ലാ പൊലീസ് മേധാവി ബി. അശോകന്, ദുരന്ത നിവാരണ വിഭാഗം ഡെപ്യൂട്ടി കളക്ടര് ഇ. മുഹമ്മദ് സഫീര്, കര, വ്യോമ സേനാ വിഭാഗങ്ങളുടേയും കോസ്റ്റ് ഗാര്ഡിന്റേയും പ്രതിനിധികള്, വിവിധ സര്ക്കാര് വകുപ്പുകളുടെ ജില്ലാ മേധാവികള് തുടങ്ങിയവര് പങ്കെടുത്തു.
ദുബായ്: തിരക്കേറിയ സമയങ്ങളിൽ എമിറേറ്റ്സ് റോഡിൽ ചരക്കുവാഹനങ്ങൾക്ക് ഏർപ്പെടുത്തിയ നിയന്ത്രണം ഗതാഗതം സുഗമമാക്കാനും അപകടങ്ങൾ കുറയ്ക്കാനും സഹായിച്ചതായി ആർടിഎയും ദുബായ്…
റാസൽഖൈമ: 2027ൽ വിൻ അൽ മർജാൻ ഐലൻഡും ഉൾപ്പെടുന്ന വമ്പൻ പദ്ധതികൾ യാഥാർത്ഥ്യമാകുന്നതിനോടനുബന്ധിച്ച് ഒഴുകിയെത്തുന്ന വിനോദസഞ്ചാരികളെ വരവേൽക്കാൻ റാസൽഖൈമ രാജ്യാന്തര…
മസ്കത്ത് ∙ ഒമാൻ ദേശീയദിനാഘോഷത്താടനുബന്ധിച്ച് മസ്കത്ത് ഇന്ത്യൻ എംബസി ഇന്ന് അവധിയായിരിക്കുമെന്ന് അധികൃതർ അറിയിച്ചു. കോൺസുലാർ സേവനങ്ങൾക്ക് 98282270 എന്ന…
മസ്കത്ത്: ഒമാൻ ദേശീയ ദിനാഘോഷങ്ങളുടെ ഭാഗമായി ഒമാൻ എയർ ഗ്ലോബൽ സെയിൽ പ്രഖ്യാപിച്ചു. 2026 ജനുവരി 15 മുതൽ മാർച്ച്…
ഷാർജ: വ്യാഴാഴ്ച പുലർച്ചെ യുഎഇയിൽ പെയ്തിറങ്ങിയ കനത്ത മൂടൽമഞ്ഞ് ഷാർജ രാജ്യാന്തര വിമാനത്താവളത്തിലെ സർവീസുകൾ ഗുരുതരമായി ബാധിച്ചു. ദൂരക്കാഴ്ച വളരെ…
മസ്കത്ത് ∙ ഒമാനി റിയാലിന്റെ ചിഹ്നം ഔദ്യോഗികമായി പുറത്തിറക്കി സെൻട്രൽ ബാങ്ക് ഓഫ് ഒമാൻ (സിബിഒ). ഒമാനി റിയാലിന് ഏകീകൃത…
This website uses cookies.