ഹൂതി ആക്രമണത്തില്‍ കൊല്ലപ്പെട്ട രണ്ട് ഇന്ത്യാക്കാരുടെ മൃതദേഹങ്ങള്‍ സ്വദേശത്തേക്ക് കൊണ്ടുപോയി

ഓയില്‍ ടാങ്കര്‍ സ്‌ഫോടനത്തില്‍ കൊല്ലപ്പെട്ടവരായ പഞ്ചാബ് സ്വദേശികളുടെ മൃതദേഹങ്ങളാണ് നാട്ടിലേക്ക് കൊണ്ടുപോയത്

അബുദാബി  : ജനുവരി പതിനേഴിന് മുസഫ വ്യവസായ മേഖലയില്‍ ഹൂതികളുടെ ഡ്രോണാക്രമണത്തില്‍ ഓയില്‍ ടാങ്കറിന് തീപിടിച്ച് കൊല്ലപ്പെട്ട രണ്ട് പഞ്ചാബ് സ്വദേശികളുടെ മൃതദേഹങ്ങള്‍ ഇന്ത്യന്‍ എംബസിയുടെ നേതൃത്വത്തില്‍ അനന്തര നിയമ നടപടികള്‍ക്ക് ശേഷം സ്വദേശത്തേക്ക് കൊണ്ടു പോയി.

യുഎഇയിലെ ഇന്ത്യന്‍ അംബാസഡര്‍ സന്‍ജയ് സുധീറാണ് ഇക്കാര്യം അറിയിച്ചത്. മരിച്ചവരുടെ പേരുവിവരങ്ങള്‍ ഔദ്യോഗികമായി അറിയിച്ചിട്ടില്ല. ഇവര്‍ പഞ്ചാബ് സ്വദേശികളാണെന്ന വിവരമാണ് എംബസി നല്‍കിയത്.

മരിച്ചവരുടെ മൃതദേഹങ്ങള്‍ അമൃത് സറിലെ വിമാനത്താവളത്തില്‍ വെള്ളിയാഴ്ച രാവിലെ എത്തുമെന്നും അദ്ദേഹം അറിയിച്ചു.

മൃതദേഹം നാട്ടിലെത്തിക്കുന്നതിനു മുമ്പുള്ള നടപടികള്‍ പൂര്‍ത്തിയാക്കാന്‍ യുഎഇ സര്‍ക്കാരിന്റെ ഭാഗത്തു നിന്നും ഊര്‍ജ്ജിത പിന്തുണ ലഭിച്ചെന്നും അംബാസഡര്‍ അറിയിച്ചു.

ജനുവരി പതിനേഴിന് രാവിലെ അബുദാബി നാഷണല്‍ ഓയില്‍ കമ്പനിയുടെ സംഭരണ ശാലയ്ക്ക് സമീപം പാര്‍ക്ക് ചെയ്തിരുന്ന മൂന്നു ഓയില്‍ ടാങ്കറുകള്‍ക്ക് മേലാണ് ഡ്രോണാക്രമണം ഉണ്ടായത്.

യെമനിലെ വിമത സംഘടനയായ ഹൂതികളാണ് ഇതിനു പിന്നിലെന്ന് യുഎഇ അറിയിച്ചു. ലോക രാഷ്ട്രങ്ങള്‍ ഇറാന്റെ പിന്തുണയുള്ള ഹൂതികളുട നടപടിയില്‍ പ്രതിഷേധിക്കുകയും യുഎഇക്ക് പരിപൂര്‍ണ പിന്തുണ പ്രഖ്യാപിക്കുകയും ചെയ്തിരുന്നു.

സംഭവത്തിനു പിന്നാലെ യെമനിലെ ഹൂതി ശക്തികേന്ദ്രങ്ങളില്‍ സൗദിയുടെ നേതൃത്വത്തിലുള്ള സഖ്യ സേന പ്രത്യാക്രമണം നടത്തി. കുറച്ചു ദിവസങ്ങള്‍ക്കു മുമ്പ് സൗദിയിലേക്ക് പോയ യുഎഇയുടെ ചരക്കു കപ്പല്‍ ഹൂതി വിമതര്‍ പിടിച്ചെടുത്തിരുന്നു.