അസമില്‍ പ്രളയത്തില്‍ മരിച്ചവരുടെ എണ്ണം ഉയരുന്നു

ഗുവാഹത്തി: സംസ്ഥാനത്ത് പ്രളയത്തില്‍ മരിച്ചവരുടെ എണ്ണം ഉയരുന്നു. പ്രളയ കെടുതികളെ തുടര്‍ന്ന് മരിച്ചവരുടെ എണ്ണം 81 ആയി. മണ്ണടിച്ചിലില്‍ 26 പേര്‍ക്ക് ജീവന്‍ നഷ്ടമാവുകയും ചെയ്തു. അതേസമയം വെള്ളിയാഴ്ച മുതല്‍ പല സ്ഥങ്ങളിലെയും നദികളിലെ ജലനിരപ്പ് അപകട ഭീഷണിയില്‍ നിന്നും താഴെയായിട്ടുണ്ട്. എന്നാല്‍ ചില മേഖലകളില്‍ ഇപ്പോഴും സ്ഥിതി വളരെ ഗുരുതരമായി തുടരുകയാണ്. സംസ്ഥാനത്ത് 36 ലക്ഷത്തിലധികം പേരെയാണ് പ്രളയം ബാധിച്ചിരിക്കുന്നത്. പ്രളയത്തെ തുടര്‍ന്ന് വന്‍ തോതിലുളള നാശനഷ്ടങ്ങളാണ് അസമില്‍ റിപ്പോര്‍ട്ട് ചെയ്തിരിക്കുന്നത്. അതേസമയം പ്രളയത്തെ നേരിടുന്നതിന് കേന്ദ്ര സര്‍ക്കാരിന്റെ എല്ലാ പിന്തുണയും അസമിന് ഉണ്ടാകുമെന്ന് പ്രധാനമന്ത്രി നരേന്ദ്ര മോദി പറഞ്ഞു. സ്ഥിതിഗതികള്‍ വിലയിരുത്തുന്നതിനായി മുഖ്യമന്ത്രി ഇന്നലെ മോാറിഗാവ് ജില്ല സന്ദര്‍ശിച്ചിരുന്നു.

290 ദുരിതാശ്വാസ ക്യാമ്പുകളിലായി 47,465 പേരാണ് അഭയം തേടിയിരിക്കുന്നത്. സംസ്ഥാനത്തെ 26ജില്ലകളിലാണ് അതിരൂക്ഷമായി പ്രളയം ബാധിച്ചിരിക്കുന്നത്. ദുബ്രി, ഗോള്‍പാറ, ബാര്‍പേട്ട, മോറിഗാവ് എന്നീ നാല് ജില്ലകളിലാണ് പ്രളയം ഏറ്റവും കൂടുതല്‍ ബാധിച്ചത്. 2,678 ഗ്രാമങ്ങളാണ് വെള്ളപ്പൊക്കത്തില്‍ തകര്‍ന്നത്. 1,27,955 ഹെക്ടര്‍ കൃഷിഭൂമിയും പ്രളയത്തില്‍ മുങ്ങിപ്പോയി. നൂറുകണക്കിന് വീടുകള്‍ പൂര്‍ണ്ണമായും ഭാഗികമായും തകര്‍ന്നിട്ടുണ്ട്. കൂടാതെ കാസരിംഗ ദേശീയോദ്യാനത്തില്‍ നൂറോളം വന്യജീവികള്‍ കൊല്ലപ്പെട്ടുവെന്നാണ് വനംവകുപ്പിന്റെ റിപ്പോര്‍ട്ട്. ദേശീയോദ്യാനത്തിന്റെ 85ശതമാനം പ്രദേശവും വെളളത്തിനടിയിലാണ്. കോവിഡും പ്രളയവും ഒരേസമയത്ത് ബാധിച്ചിരിക്കുന്നതിനാല്‍ സര്‍ക്കാരിന് ഇരട്ട വെല്ലുവിളിയാണ് നേരിടേണ്ടി വരുന്നത്.