അമേരിക്കന്‍ പ്രസിഡന്റ് തെരഞ്ഞെടുപ്പ്: പ്രചാരണ തിരക്കില്‍ ജോ ബൈഡന്‍

അമേരിക്കയില്‍ പ്രസിഡന്റ് തെരഞ്ഞെടുപ്പ് ചൂട് തുടങ്ങി. ഇരുണ്ട കാലഘട്ടത്തെ അതിജീവിക്കാന്‍ അമേരിക്കയ്ക്ക് കഴിയുമെന്ന് പ്രഖ്യാപിച്ച് ഡെമോക്രാറ്റിക് സ്ഥാനാര്‍ത്ഥി ജോ ബൈഡന്‍ പ്രചാരണം ആരംഭിച്ചു കഴിഞ്ഞു. കോവിഡ് മഹാമാരി ഉണ്ടാക്കിയ പ്രതിസന്ധി മാത്രമല്ല, ജോര്‍ജ് ഫ്‌ളോയിഡിന്റെ കൊലപാതകം തീര്‍ത്ത വംശീയ വിദ്വോഷത്തിന്റെ മുറിവുകളെ ഉണക്കാനും തനിക്ക് കഴിയുമെന്ന് ജോ ബൈഡന്‍ പ്രചാരണ പ്രസംഗത്തില്‍ പറഞ്ഞു. രാജ്യത്തെ ഭിന്നിപ്പിക്കുന്ന രാഷ്ട്രീയമാണ് ഡൊണാള്‍ഡ് ട്രംപിന്റേതെന്ന് ബൈഡന്‍ വിമര്‍ശിച്ചു. എന്നാല്‍ നിയമവാഴ്ച നടപ്പാക്കാന്‍ ബൈഡന് കഴിയില്ലെന്ന് ട്രംപ് തിരിച്ചടിച്ചു.

അതേസമയം, ജോ ബൈഡന്‍ യുഎസ് പ്രസിഡന്റ് ആകുമെന്നാണ് അമേരിക്കന്‍ സര്‍വകലാശാലയിലെ ഹിസ്റ്ററി വിഭാഗം പ്രൊഫസര്‍ അലന്‍ ലിച്ച്മാന്റെ പ്രവചനം. നിരീക്ഷണങ്ങള്‍ക്ക് ശേഷമാണ് ലിച്ച്മാന്റെ പ്രവചനം. കോവിഡിലെ അമേരിക്കയുടെ വീഴ്ച്ച, വംശീയ അധിക്ഷേപം, പോലീസ് അക്രമങ്ങളുടെ വര്‍ധന എന്നിവയാണ് ട്രംപിന് തിരിച്ചടിയാകുന്നതെന്ന് അദ്ദേഹം വിലയിരുത്തുന്നു. കഴിഞ്ഞ തെരഞ്ഞെടുപ്പില്‍ എല്ലാവരും ഹിലരി ക്ലിന്റണ്‍ ജയിക്കുമെന്ന് പറഞ്ഞപ്പോഴും ട്രംപിനൊപ്പമായിരുന്നു ലിച്ച്മാന്റെ പ്രവചനം.