നിരോധനാജ്ഞ സംസ്ഥാനമാകെ ഇല്ല; വ്യക്തത വരുത്തി മന്ത്രി ഇ.ചന്ദ്രശേഖരന്‍

തിരുവനന്തപുരം: കോവിഡ് വ്യാപനം രൂക്ഷമായ സാഹചര്യത്തില്‍ പ്രഖ്യാപിച്ച നിരോധനാജ്ഞ സംസ്ഥാനത്ത് മുഴുവന്‍ ഇല്ലെന്ന് റവന്യൂ വകുപ്പ് മന്ത്രി ഇ.ചന്ദ്രശേഖരന്‍. ജില്ലകളിലെ സാഹചര്യം അനുസരിച്ച് കളക്ടര്‍മാര്‍ പ്രത്യേകം ഉത്തരവിറക്കുമെന്നും മന്ത്രി വ്യക്തമാക്കി.

അതേസമയം നിയന്ത്രണങ്ങള്‍ നിലവില്‍ വന്നാല്‍ പോലീസ് ശക്തമായി ഇടപെടുമെന്ന് സംസ്ഥാന പോലീസ് മേധാവി ലോക്‌നാഥ് ബഹ്‌റ അറിയിച്ചു. കോവിഡ് പ്രതിരോധ നടപടികളുടെ ഭാഗമായി ശനിയാഴ്ച മുതലാണ് നിരോധനാജ്ഞ അടക്കമുള്ള നിയന്ത്രണങ്ങള്‍ ഏര്‍പ്പെടുത്താന്‍ തീരുമാനിച്ചത്. ഇതു സംബന്ധിച്ച് ചീഫ് സെക്രട്ടറി ഇന്നലെ ഇറക്കിയ ഉത്തരവ് പലവിധ വ്യാഖ്യാനങ്ങള്‍ക്കും ഇടയാക്കി.

അഞ്ചില്‍ കൂടുതല്‍ പേര്‍ കൂട്ടം കൂടാന്‍ പാടില്ലെന്ന ഉത്തരവില്‍ വിവാഹങ്ങള്‍ക്കും മരണത്തിനും മാത്രമായിരുന്നു ഇളവ്. എന്നാല്‍ ഏതൊക്കെ മോഖലകളിലാണ് നിയന്ത്രണം എന്നതടക്കമുള്ള കാര്യങ്ങളില്‍ ആശയക്കുഴപ്പം ഉണ്ടായതോടെയാണ് റവന്യൂ മന്ത്രി വിശദീകരണവുമായി രംഗത്തെത്തിയത്.

ഇന്ന് വൈകിട്ടോടെ ജില്ലാ കളക്ടര്‍മാരുടെ ഉത്തരവ് ഇറങ്ങും. ആളുകള്‍ കൂട്ടം കൂടുന്നതിലൂടെ കോവിഡ് സൂപ്പര്‍സ്പ്രഡിനുള്ള സാധ്യത തടയാന്‍ ശക്തമായ നടപടികള്‍ ഉണ്ടാകും. ഒക്ടോബര്‍ 31 വരെ നിയന്ത്രണങ്ങള്‍ തുടരുമെന്നാണ് ചീഫ് സെക്രട്ടറിയുടെ ഉത്തരവില്‍ പറയുന്നത്.