ഹജ് തീർഥാടകർക്കായി ചൂടിനെതിരെ ആരോഗ്യ ബോധവൽക്കരണ കിറ്റ് പുറത്തിറക്കി

മക്ക :കടുത്ത ചൂടിനിടയിലും ഹജ്ജ് തീർഥാടനം ആരോഗ്യപരമായി സുരക്ഷിതമാക്കാൻ സൗദി ആരോഗ്യ മന്ത്രാലയം 8 ഭാഷകളിൽ ആരോഗ്യ ബോധവൽക്കരണ കിറ്റ് പുറത്തിറക്കി. അറബിക്, ഇംഗ്ലീഷ്, ഫ്രഞ്ച്, ഉറുദു, പേർഷ്യൻ, ഇന്തൊനേഷ്യൻ, മലായ്, ടർക്കിഷ് എന്നീ ഭാഷകളിലാണ് മാർഗനിർദേശങ്ങൾ ലഭ്യമാക്കിയിരിക്കുന്നത്.

ലഘുലേഖകൾ, വീഡിയോകൾ, സമൂഹമാധ്യമ പോസ്റ്റുകൾ എന്നിവയുൾപ്പെടുന്ന കിറ്റിൽ സൂര്യപ്രകാശത്തെ നേരിട്ട് ഒഴിവാക്കാനുള്ള മാർഗങ്ങൾ, കുടയുപയോഗം, നിർജലീകരണം തടയാൻ ആവശ്യമായ മാർഗങ്ങൾ എന്നിവയെക്കുറിച്ചാണ് പ്രധാനമായി വ്യക്തമാക്കുന്നത്. തീർഥാടകർക്കായി ഈ കിറ്റ് ഉപയോഗപ്പെടുത്താൻ സുഗമമാകുന്ന രീതിയിൽ പ്രത്യേകം തയ്യാറാക്കിയിട്ടുണ്ട്.

മെനിഞ്ചൈറ്റിസ്,, കോവിഡ്–19, പോളിയോ, ഡിഫ്തീരിയ, ടെറ്റനസ്, മഞ്ഞപ്പിത്തം, ചിക്കൻപോക്സ്, മംപ്സ്, അഞ്ചാംപനി എന്നിവയ്ക്കെതിരായ പ്രതിരോധ കുത്തിവയ്പുകൾ തീർത്ഥാടകർക്കായി നിർബന്ധിതമാണെന്നും മന്ത്രാലയം അറിയിച്ചു. പുറമേ, ദീർഘകാല രോഗങ്ങൾ ഉള്ളവർ മരുന്നുകൾക്കൊപ്പം ഡോക്ടറുടെ ആരോഗ്യ സർട്ടിഫിക്കറ്റും വേണമെന്ന നിർദേശവും നൽകിയിട്ടുണ്ട്.

തീർഥാടകരുടെ ആരോഗ്യവും സുരക്ഷയും ഉറപ്പുവരുത്താനായുള്ള പ്രതിജ്ഞാബദ്ധതയുടെ ഭാഗമായി ആരോഗ്യ മന്ത്രാലയം ഈ കിറ്റ് പുറത്തിറക്കിയതാണെന്ന് അധികൃതർ അറിയിച്ചു.