ലഹരി വിരുദ്ധ അതോറിറ്റി രൂപീകരിച്ച് യുഎഇ; ലഹരി വ്യാപനം തടയാനായി കർശന നടപടികളുമായി മുന്നോട്ട്

അബുദാബി ∙ ലഹരി ഉപയോഗവും കച്ചവടവും തടയുന്നതിനായുള്ള ദേശീയ തലത്തിലുള്ള ലഹരി വിരുദ്ധ അതോറിറ്റി രൂപീകരിച്ചതായി യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ പ്രഖ്യാപിച്ചു. അതോറിറ്റിയുടെ ചെയർമാനായി ഷെയ്ഖ് സായിദ് ബിൻ ഹമദ് ബിൻ ഹംദാൻ അൽ നഹ്യാനെ നിയമിച്ചു.

ലഹരി വിരുദ്ധ പ്രവർത്തനങ്ങളെ ഏകോപിപ്പിക്കുകയും, ജനങ്ങൾക്ക് ലഹരിയിൽ നിന്ന് സംരക്ഷണം നൽകുകയും ചെയ്യുകയാണ് പുതിയ അതോറിറ്റിയുടെ പ്രധാന ലക്ഷ്യം. വിവിധ എമിറേറ്റുകളിൽ നിലവിൽ നടക്കുന്ന പ്രവർത്തനങ്ങളെ ഏകീകരിക്കാൻ അതോറിറ്റി പ്രധാനപ്പെട്ട പങ്ക് വഹിക്കും.

ഇത് യുഎഇ മന്ത്രിസഭയുടെ കീഴിലുള്ള സ്വതന്ത്ര വകുപ്പായാണ് നിലകൊള്ളുക. ഇതിനായി ആഭ്യന്തര മന്ത്രാലയത്തിന്റെ ഭാഗമായിരുന്ന ജനറൽ ഡിപ്പാർട്മെന്റ് ഓഫ് ആന്റി നർക്കോട്ടിക്സിന്റെ ചുമതലകൾ ഇപ്പോൾ പുതിയ അതോറിറ്റിയിലേക്ക് മാറ്റി നൽകി. ഇനി മുതൽ ലഹരി കച്ചവടം തടയുന്നതിനുള്ള നയനിർമാണവും നിയമരൂപീകരണവും ഈ അതോറിറ്റിയാകും നിർവഹിക്കുക.

ലഹരി കടത്ത്, വിതരണം തുടങ്ങിയ പ്രവർത്തനങ്ങൾ കണ്ടെത്തുകയും അതിനോടുള്ള നടപടി സ്വീകരിക്കുകയും ചെയ്യുന്നതിന് എമിറേറ്റുകളിലും ദേശീയ തലത്തിലും പ്രവർത്തിക്കുന്ന ഏജൻസികളുടെ സഹകരണം അതോറിറ്റി തേടും.

പോലീസും ജുഡീഷ്യൽ സംവിധാനവും ഉൾപ്പെടുത്തി, കുറ്റക്കാർക്കെതിരെ നിയമ നടപടി എടുക്കുന്നതിനും ലഹരി വിരുദ്ധ നിയമങ്ങൾ കൂടുതൽ ശക്തമാക്കുന്നതിനും അതോറിറ്റിക്ക് അധികാരമുണ്ട്. നിലവിലെ നിയമങ്ങളിൽ ആവശ്യമുള്ള ഭേദഗതികളും പുതിയ നിയമങ്ങൾ അവതരിപ്പിക്കാനും അതോറിറ്റിക്ക് അവകാശമുണ്ട്. മന്ത്രിസഭയുടെ അംഗീകാരത്തോടെ ഇവ നടപ്പാക്കും.

റാസായ വസ്തുക്കളുടെ ഉപയോഗം നിയന്ത്രിക്കാൻ പുതിയ ലൈസൻസിംഗ് സംവിധാനം കൊണ്ടുവരാനും മരുന്നുകൾ നിർമ്മാണം ഒഴികെയുള്ള ഉപയോഗങ്ങൾക്ക് മുൻകൂർ അനുമതി നിർബന്ധമാക്കാനുമാണ് അതോറിറ്റി ശ്രമിക്കുന്നത്. കര, സമുദ്ര, വ്യോമ അതിർത്തികളിൽ ലഹരി പരിശോധന ശക്തമാക്കുന്നതിനായി കസ്റ്റംസ് അടക്കമുള്ള ഏജൻസികളുമായി സഹകരിച്ച് പ്രവർത്തിക്കും.

ലഹരി ഇടപാടുകളുമായി ബന്ധപ്പെട്ട മുഴുവൻ വിവരങ്ങളും ഉൾപ്പെടുത്തുന്ന ഒരു ദേശീയ ഡാറ്റാബേസ് അതോറിറ്റി രൂപീകരിക്കും. ലഹരി വിരുദ്ധ പ്രവർത്തനങ്ങളിൽ ഏർപ്പെട്ടിരിക്കുന്ന ഏജൻസികൾക്ക് എപ്പോഴും ഈ ഡാറ്റാബേസ് ആക്‌സസ് ചെയ്യാൻ കഴിയുന്ന രീതിയിൽ സജ്ജമാക്കും.