യുഎഇ : ദുബായ്, അല്‍ ഐന്‍ എന്നിവടങ്ങളില്‍ വേനല്‍മഴ, ആലിപ്പഴ വര്‍ഷം

ശക്തമായ കാറ്റും ഒറ്റപ്പെട്ട മഴയും ഇടിമിന്നലും ഉണ്ടായി അടുത്ത ദിവസങ്ങളിലും പ്രതിഭാസം ആവര്‍ത്തിച്ചേക്കാം

ദുബായ് :  യുഎഇയിലെ കിഴക്കന്‍ മേഖലകളില്‍ മഴയും ആലിപ്പഴ വര്‍ഷവും അനുഭവപ്പെട്ടു. കടുത്ത വേനലിലേക്ക് രാജ്യം നീങ്ങുന്നതിനിടെയാണ് ആലിപ്പഴ വര്‍ഷത്തോടെ മഴ പെയ്തത്.

അല്‍ ഐനിലും ദുബായിലെ ചില ഭാഗങ്ങളിലുമാണ് മഴ പെയ്തത്. ഇടിമിന്നലും അനുഭവപ്പെട്ടു.

മഴയ്ക്കായി നടത്തിയ ക്ലൗഡ് സീഡിംഗിനെ തുടര്‍ന്നാണ് വേനല്‍മഴ ലഭിച്ചതെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.

ദുബായ് -അല്‍ഐന്‍ റോഡില്‍ കനത്ത മഴ പെയ്തു. ഇവിടങ്ങളില്‍ വാഹനം ഓടിക്കുന്നവര്‍ ജാഗ്രത പുലര്‍ത്തണമെന്ന് പോലീസ് മുന്നറിയിപ്പ് നല്‍കി. ദൂരക്കാഴ്ച കുറയുകയും പലയിടങ്ങളിലും റോഡുകളില്‍ വെള്ളക്കെട്ട് രൂപപ്പെടാന്‍ സാധ്യതയുമുണ്ടെന്ന് പോലീസ് അറിയിച്ചു.

അടുത്ത മൂന്നു ദിവസം കൂടി സമാനമായ കാലാവസ്ഥ തുടരാം. ജൂലൈ എട്ടുവരെ മഴയ്ക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.