മോസ്കോയിൽ പുതിയ സൗദി എംബസി കെട്ടിടം; വിദേശകാര്യ മന്ത്രി അമീർ ഫൈസൽ ഉദ്‌ഘാടനം ചെയ്തു

റിയാദ് ∙ റഷ്യൻ തലസ്ഥാനമായ മോസ്കോയിൽ പുതുതായി നിർമിച്ച സൗദി അറേബ്യൻ എംബസിയുടെ പുതിയ കെട്ടിടം വിദേശകാര്യ മന്ത്രി അമീർ ഫൈസൽ ബിൻ ഫർഹാൻ ഔദ്യോഗികമായി ഉദ്ഘാടനം ചെയ്തു. ചടങ്ങിന്റെ ഭാഗമായി മന്ത്രി ശിലാഫലകം അ​നാ​ച്ഛാ​ദ​നം ചെയ്തു.

പുതിയ ആസ്ഥാനത്തിന്റെ സൗകര്യങ്ങളും വകുപ്പുകളും വിദേശകാര്യ മന്ത്രി നേരിൽ സന്ദർശിച്ചു. വിദേശത്തുള്ള സൗദി പൗരന്മാർക്കും വിദേശികളായ സന്ദർശകർക്കും മികച്ച സേവനങ്ങൾ നൽകുന്നതിന് ആവശ്യമായ അടിസ്ഥാന സൗകര്യങ്ങൾ വികസിപ്പിക്കുന്നതിനുള്ള മന്ത്രാലയത്തിന്റെ തുടർച്ചയായ ശ്രമങ്ങളുടെ ഭാഗമാണ് പുതിയ കെട്ടിടം.

നയതന്ത്ര പ്രവർത്തനങ്ങൾ വികസിപ്പിക്കാനും, രാജ്യത്തിന്റെ വിദേശ ദൗത്യങ്ങളുടെയും പ്രതിനിധിത്വത്തിന്റെയും കാര്യക്ഷമത വർദ്ധിപ്പിക്കാനും ലക്ഷ്യമിട്ടുള്ള സമഗ്ര കാഴ്ചപ്പാടിന്റെ ഭാഗമായാണ് ഈ സംരംഭം.

ഉദ്ഘാടന ചടങ്ങിൽ വിദേശകാര്യ സഹമന്ത്രി അബ്ദുൽ ഹാദി അൽ മൻസൂരി, രാഷ്ട്രീയകാര്യ അണ്ടർ സെക്രട്ടറി ഡോ. സുഊദ് അൽ സാത്വി, റഷ്യയിലെ സൗദി അംബാസഡർ അബ്ദുൽറഹ്മാൻ അൽ അഹമ്മദ്, വിദേശകാര്യ മന്ത്രാലയത്തിലെ പദ്ധതികളുടെയും ആസ്തികളുടെയും അണ്ടർ സെക്രട്ടറി എഞ്ചിനിയർ ഖാലിദ് അൽ റുമൈഹ്, മറ്റ് നിരവധി ഉന്നത ഉദ്യോഗസ്ഥർ എന്നിവരും പങ്കെടുത്തു.