മന്ത്രിയുടെ ബന്ധുനിയമനം: യോഗ്യതയില്‍ ഇളവ് വരുത്തിയ ഫയലില്‍ മുഖ്യമന്ത്രിയും ഒപ്പിട്ടു

മന്ത്രി കെ ടി ജലീലിന്റെ ബന്ധു അദീബിനെ ന്യൂനപക്ഷ വികസന കോര്‍പ്പറേഷന്‍ ജനറല്‍ മാനേജര്‍ തസ്തികയില്‍ നിയമി ക്കാനായി യോഗ്യതയില്‍ ഇളവ് വരുത്താനുള്ള ഫയലില്‍ മുഖ്യമന്ത്രിയും ഒപ്പിട്ടതിന്റെ രേഖകള്‍ പുറത്ത്

തിരുവനന്തപുരം: മന്ത്രി കെ ടി ജലീലിന്റെ ബന്ധു അദീബിനെ ന്യൂനപക്ഷ വികസന കോര്‍പ്പറേഷന്‍ ജനറല്‍ മാനേജര്‍ തസ്തികയില്‍ നിയമി ക്കാനായി യോഗ്യതയില്‍ ഇളവ് വരുത്താനുള്ള ഫയലില്‍ മുഖ്യമന്ത്രിയും ഒപ്പിട്ടതിന്റെ രേഖകള്‍ പുറത്ത്. സൗത്ത് ഇന്ത്യന്‍ ബാങ്ക് ഉദ്യോഗസ്ഥനായ അദീബിന്റ നിയമനം അഡീഷണല്‍ സെക്രട്ടറി എതിര്‍ത്തിരുന്നതായും പുറത്തായ രേഖകളില്‍ വ്യക്തമാണ്. മുഖ്യമന്ത്രി ഫയലില്‍ ഒപ്പിട്ടത് 2016 ആഗസ്ത് 9നാണ്. ന്യൂനപക്ഷ വകുപ്പിലെ ഉദ്യോഗസ്ഥര്‍ക്ക് ഇത്തരത്തില്‍ യോഗ്യതയില്‍ ഇളവ് വരുത്തുന്നതില്‍ എതിര്‍പ്പുണ്ടായിരുന്നു. യോഗ്യതയില്‍ ഇളവ് വരുത്തുന്ന കാര്യം മന്ത്രിസഭയില്‍ വെയ്‌ക്കേണ്ടെന്ന് മുഖ്യമന്ത്രിയും സമ്മതിച്ചു. കെ ടി ജലീല്‍ നിയമന ഫയലില്‍ കാണിച്ചത് അമിത താത്പര്യമാണെന്ന് രേഖകളില്‍ നിന്ന് വ്യക്തം.

ജനറല്‍ മാനേജര്‍ നിയമനത്തിനുള്ള യോഗ്യത അദീബിന്റെ യോഗ്യതക്ക് അനുസരിച്ച് മാറ്റാന്‍ ജലീ ല്‍ നിര്‍ദ്ദേശിച്ച കത്ത് ഇന്നലെ പുറത്ത് വന്നതിന് പിന്നാലെയാണ് മന്ത്രിയെ പ്രതിക്കൂട്ടിലാക്കുന്ന പുതിയ രേഖകള്‍ കൂടി ഇന്ന് പുറത്തായിരിക്കുന്നത്.

സൗത്ത് ഇന്ത്യന്‍ ബാങ്ക് ജീവനക്കാരനായ അദീബിന്റെ നിയമനത്തെ ന്യൂനപക്ഷവകുപ്പിലെ ഉദ്യോഗസ്ഥര്‍ പല തവണ എതിര്‍ത്തിരുന്നു. അദീബിന്റെ നിയമനവുമായി ബന്ധപ്പെട്ട ഫയലുകളിലെല്ലാം കാണുന്നത് ജലീലിന് അമിത താല്പര്യമുണ്ടായിരുന്നു. ബന്ധുനിയമനം വിവാദ മായപ്പോള്‍ മന്ത്രിയെ പൂര്‍ണ്ണമായും പിന്തുണച്ച മുഖ്യമന്ത്രി, ജലീലിന്റെ നിര്‍ദ്ദേശപ്രകാരം അദീബിനായുള്ള യോഗ്യതാ മാറ്റത്തെ അനുകൂലിക്കുകയും ചെയ്തുവെന്നാണ് രേഖകള്‍ വ്യക്തമാക്കുന്നു.

അദീബിന്റെ മാതൃസ്ഥാപനമായ സൗത്ത് ഇന്ത്യന്‍ ബാങ്ക് അനുമതി നല്‍കിയതിനാല്‍ അദീബിനെ നിയമിച്ച് ഉത്തരവിറക്കാന്‍ 28-9-18ന് ജലീലിന്റെ നിര്‍ദ്ദേശം. മന്ത്രി നിലപാട് കടുപ്പിച്ചതോടെ എതിര്‍പ്പ് ഉയര്‍ത്തിയ ഉദ്യോഗസ്ഥര്‍ പിന്‍വാങ്ങി. പിന്നാലെ അദീബിനറെ നിയമിച്ച് ഉത്തരവിറക്കി.നിയമന ഉത്തരവിട്ട ഫയലിലെ മന്ത്രി ജലീല്‍ നടത്തിയ ഇടപെടലുകളടക്കം പരിശോധിച്ചാണ് ലോകായുക്ത സ്വജനപക്ഷപാതം നടന്നെന്നും മന്ത്രിയെ പുറത്താക്കണമെന്ന നിര്‍ണ്ണായക ഉത്തരവിറക്കാന്‍ കാരണമായി.