ബംഗാളിലെ സ്ഥിതി പാഠമാകണം, വീഴ്ചകൾ ഉണ്ടാകരുതെന്ന് പ്രവർത്തന റിപ്പോർട്ട്

കൊല്ലം: അധികാരത്തിൽ തുടർച്ചയായി ഒൻപതാംവർഷം പിന്നിടുമ്പോൾ ബംഗാളിനെ ഓർമ്മപ്പെടുത്തി പ്രവർത്തന റിപ്പോർട്ടിൽ പരാമർശം. വീണ്ടും തുടർഭരണം ലക്ഷ്യമിട്ടുള്ള പ്രവർത്തനങ്ങൾ ആവിഷ്കരിക്കുമ്പോൾ ബംഗാളിലെ സ്ഥിതി പാഠമാകണമെന്നാണ് ഓർമ്മപ്പെടുത്തൽ. തുടർച്ചയായ ഭരണത്തിൽ ബംഗാളിൽ ഉണ്ടായ വീഴ്ചകൾ ഇവിടെയുണ്ടാകരുത്. അധികാര കേന്ദ്രമാണ് പാർട്ടിക്കാർ എന്ന തോന്നൽ ജനങ്ങൾക്കുണ്ടാകരുത്. തുടർഭരണം ലഭിച്ച ഘട്ടത്തിൽ ഇക്കാര്യത്തിൽ പ്രത്യേക മാർഗനിർദേശം നൽകിയിരുന്നു.
അടിസ്ഥാന വിഭാഗമായ തൊഴിലാളികളും സാധാരണക്കാരും മാത്രമല്ല മധ്യവർഗത്തെയും പാർട്ടിയുടെ ഭാഗമാക്കണമെന്നും അതിനായുള്ള പ്രവർത്തനങ്ങൾക്ക് ഊന്നൽ നൽകണമെന്നും സി.പി.എം. പ്രവർത്തന റിപ്പോർട്ടിൽ പ്രത്യേക പരാമർശം. തൃശ്ശൂർ, എറണാകുളം സമ്മേളനങ്ങൾ ചർച്ചചെയ്ത വിഷയത്തിലാണ് വീണ്ടും ഓർമ്മപ്പെടുത്തൽ. നോക്കു കൂലിക്കെതിരായ നിലപാടും അനാവശ്യ തൊഴിൽ സമരങ്ങൾ ഒഴിവാക്കാനാകുന്നതും പശ്ചാത്തല മേഖലയിൽ ഉണ്ടാകുന്ന വികസനങ്ങളും വ്യവസായ സൗഹൃദ സാഹചര്യങ്ങളും ഇടത്തട്ടുകാർക്കു പ്രയോജനകരമായി.ഇനിയും ഇവർക്ക് പാർട്ടിയോട് ആഭിമുഖ്യം ഉണ്ടാക്കാൻ അവരുടെ പ്രശ്നങ്ങൾ തിരിച്ചറിഞ്ഞ് സംഘടനാപരമായ ഇടപെടലുകളുണ്ടാകണം. പാർട്ടിയുടെ നെടുംതൂണായ അടിസ്ഥാന വിഭാഗങ്ങളെയും സാധാരണക്കാരെയും ചേർത്തു പിടിച്ചാകും ഇടത്തട്ടു കാരുമായുള്ള സൗഹൃദം.
അംഗങ്ങളുടെ എണ്ണത്തിൽ കുതിപ്പുണ്ടാകുമ്പോഴും പ്രത്യയശാസ്ത്ര അടിത്തറയിൽ ഇളക്കമെന്ന് പാർട്ടിക്ക് ആശങ്ക. പാർട്ടി ആശയങ്ങൾ ഉൾക്കൊള്ളാനോ പ്രചരിപ്പിക്കാനോ കഴിയാത്തവരാണ് കൂടുതൽ അംഗങ്ങളും താഴെത്തട്ടിലെ നേതാക്കളും. ഇതിനു പരിഹാരം കാണാൻ പാർട്ടിക്ലാസുകൾ നിർബന്ധിതമാക്കിയിട്ടുണ്ടെങ്കിലും ലക്ഷ്യത്തിലേക്കെത്തിയിട്ടില്ല. സംരക്ഷണത്തിനും നിലനിൽക്കാനും അംഗത്വത്തിലേക്കെത്തുന്നവരുണ്ട്. തുടർ ഭരണത്തിൽ ഈ പ്രവണത കൂടുന്നുണ്ട്. ഇതിൽ അടിത്തട്ടിൽ സൂക്ഷ്മമായ പരിശോധനയും പുനഃപരിശോധനയും വേണമെന്ന്‌ റിപ്പോർട്ട് നിർദേശിക്കുന്നു.