ഫ്യുജെയ്‌റ : മഴക്കെടുതിയില്‍ പാസ്‌പോര്‍ട്ട് നഷ്ടപ്പെട്ടവരും

മലയാളികള്‍ ഉള്‍പ്പടെയുള്ള പ്രവാസികളുടെ യാത്രാ രേഖകള്‍ നഷ്ടപ്പെട്ടതായാണ് വിവരം

ഫ്യുജെയ്‌റ:  മഴക്കെടുതിയില്‍ വീടുകളില്‍ വെള്ളം കയറിയതിനെ തുടര്‍ന്ന് ഫ്യജെയ്‌റയിലെ ചില പ്രവാസികള്‍ക്ക് യാത്രാ രേഖകള്‍ അടക്കമുള്ളവ നഷ്ടപ്പെട്ടതായി റിപ്പോര്‍ട്ടുകള്‍.

യാത്രാ രേഖകള്‍ നഷ്ടപ്പെട്ടവര്‍ എംബസിയുമായി ബന്ധപ്പെടമെന്ന് അറിയിച്ചിട്ടുണ്ട്. പുതിയ പാസ്‌പോര്‍ട്ടും മറ്റും രേഖകളും അടിയന്തരമായി അനുവദിക്കും.

എന്നാല്‍, അവധിക്ക് നാട്ടില്‍ പോകാന്‍ തയ്യാറെടുത്ത ചിലര്‍ക്ക് രേഖകള്‍ നഷ്ടപ്പെട്ടത് വിഷയമായി.

പാസ്‌പോര്‍ട്ട്, ലൈസന്‍സ്, സര്‍ട്ടിഫിക്കേറ്റുകള്‍ എന്നിവ നഷ്ടപ്പെട്ടവരുമുണ്ട്. വീടുകളില്‍ നിന്ന് വെള്ളം ഇറങ്ങിയെങ്കിലും താമസ യോഗ്യമായിട്ടില്ല. സന്നദ്ധ സംഘടനകളാണ് ഇവര്‍ക്ക് ഭക്ഷണവും മറ്റു സൗകര്യങ്ങളും ഒരുക്കിയിട്ടുള്ളത്.

ഹോട്ടലുകളിലേക്ക് മാറ്റിയവരും ബന്ധുക്കള്‍ക്കും സുഹൃത്തുക്കള്‍ക്കും ഒപ്പം താമസിക്കുന്നവരും താമസിയാതെ തങ്ങളുടെ താമസയിടങ്ങളിലേക്ക് തിരികെ എത്തിത്തുടങ്ങി.

വീടുകളിലെ ഫ്രിഡ്ജ് അടക്കമുള്ള ഇലക്ട്രിക് ഉപകരണങ്ങളും ഗ്യാസ് സ്റ്റൗവും എല്ലാം ഉപയോഗ ശൂന്യമായ അവസ്ഥയിലാണ്.

മലയാളികള്‍ അടക്കമുള്ള ചെറുകിട കച്ചവടക്കാരുടെ കടകളിലും മറ്റും വെള്ളം കയറി വന്‍ നാശനഷ്ടമാണ് ഉണ്ടായത്.