നൂറ ഫാത്തിമയും ആദിലയും ഒന്നിച്ചു ജീവിക്കട്ടെ- ഹൈക്കോടതി

താന്‍ ഇഷ്ടപ്പെടുന്ന ജീവിത പങ്കാളിക്കൊപ്പം ഒരുമിച്ച് ജീവിക്കാന്‍ അനുമതിക്കണമെന്ന ആദില നസ്‌റിന്റെ ഹര്‍ജിയിലാണ് കോടതി വിധി,

കൊച്ചി : സ്വവര്‍ഗനുരാഗികളായ പെണ്‍കുട്ടികള്‍ ഒന്നിച്ചു ജീവിക്കട്ടെയെന്ന് ഹൈക്കോടതി. താന്‍ ഇഷ്ടപ്പെടുന്ന ജീവിത പങ്കാളിക്കൊപ്പം ഒരുമിച്ച് ജീവിക്കാന്‍ അനുവദിക്കണമെന്ന് കാണിച്ച് ആലുവ സ്വദേശി ആദില നസ്‌റിന്‍ നല്‍കിയ ഹര്‍ദജിയിലാണ് ഹൈക്കോടതിയുടെ സുപ്രധാന വിധി.

ബന്ധുക്കള്‍ ബലമായി പിടിച്ചു കൊണ്ടുപോകുകയും സ്വവര്‍ഗാനുരാഗം വീട്ടില്‍ പറഞ്ഞപ്പോള്‍ മര്‍ദ്ദിച്ചതായും ചൂണ്ടിക്കാട്ടിയാണ് ആദില വയനാട് സ്വദേശി നൂറ ഫാത്തിമയെ വിട്ടുകിട്ടുണമെന്ന് കാണിച്ച് ഹൈക്കോടതിയെ സമീപിച്ചത്.

പ്രായപൂര്‍ത്തിയാവര്‍ക്ക് ലിംഗഭേദമില്ലാതെ ഒരുമിച്ച് ജീവിക്കാമെന്ന് കോടതി നിരീക്ഷിച്ചു. ഇതിന് വിലക്കില്ലെന്നും ജസ്റ്റീസ് വിനോദ് ചന്ദ്രന്‍ വിധി പ്രസ്താവിക്കവെ പറഞ്ഞു.

ആദില സമര്‍പ്പിച്ച ഹേബിയസ് കോര്‍പസ് ഹര്‍ജിയിലാണ് വിധി. തനിക്കൊപ്പം താമസിക്കാനെത്തിയ കൂട്ടുകാരിയെ കാണാനില്ലെന്നും ബന്ധുക്കള്‍ പിടിച്ചുകൊണ്ടുപോയെന്നും കാണിച്ചാണ് ആദില ഹൈക്കോടതിയെ സമീപിച്ചത്.

ഹര്‍ജി രാവിലെ തന്നെ പരിഗണിച്ച കോടതി പെണ്‍കുട്ടിയെ ഇന്നു തന്നെ കോടതിയില്‍ ഹാജരാക്കണമെന്ന് പോലീസിന് നിര്‍ദ്ദേശം നല്‍കി. തുടര്‍ന്ന വീട്ടുകാര്‍ പെണ്‍കുട്ടിയെ കോടതിയിലെത്തിച്ചു.

പരാതിക്കാരിയായ ആദിലയും കോടതിയില്‍ എത്തിയിരുന്നു. ഇരുവരേയും ചേംബറില്‍ വിളിച്ചു വരുത്തി സംസാരിച്ച ശേഷമാണ് ജസ്റ്റീസ് വിനോദ് ചന്ദ്രന്‍ വിധി പ്രസ്താവിച്ചത്.

സൗദി അറേബ്യയില്‍ ഒരുമിച്ച് ഒരേസ്‌കൂളില്‍ പഠിച്ചപ്പോള്‍ മുതലുള്ള പരിചയവും പ്രണയവുമാണ് ആദിലയേയും നൂറയേയും ഒരുമിച്ച് ജീവിക്കുന്നതിലേക്ക് എത്തിച്ചത്. ഇരുവരുടേയും രക്ഷിതാക്കള്‍ സുഹൃത്തുക്കളുമാണ്.