നീറ്റ് പരീക്ഷ വിദേശത്തും നടത്താൻ ഹർജി

കൊച്ചി : മെഡിക്കൽ കോളേജുകളിൽ പ്രവേശനത്തിന് നടത്തുന്ന പരീക്ഷയായ നീറ്റ് (നാഷണൽ എലിജിബിലിറ്റി എൻട്രൻസ് ടെസ്റ്റ്)  നടത്താൻ ഗൾഫ് ഉൾപ്പെടെ വിദേശരാജ്യങ്ങളിലും സെന്ററുകൾ അനുവദിക്കണമെന്ന ആവശ്യപ്പെട്ട് ഹൈക്കോടതിയിൽ ഹർജി സമർപ്പിച്ചു.
ഖത്തറിലെ കേരള മുസ്‌ളിം കൾച്ചറൽ സെന്റർ ജനറൽ സെക്രട്ടറി അബ്ദുൾ അസീസാണ് ഹർജി സമർപ്പിച്ചത്.
നാഷണൽ ടെസ്റ്റിംഗ് ഏജൻസി (എൻ.ടി.എ) ജൂലായ് 26 നാണ് രാജ്യവ്യാപകമായി പരീക്ഷ നടത്തുന്നത്. ഖത്തറിൽ മാത്രം മുന്നൂറോളം വിദ്യാർത്ഥികൾ അപേക്ഷിച്ചിട്ടുണ്ട്. ഇവിടെ പരീക്ഷാ കേന്ദ്രം അനുവദിക്കണമെന്നാവശ്യപ്പെട്ട് നിവേദനം നൽകിയിരുന്നു. എൻ.ടി.എ അധികൃതർ ഇതിൽ തീരുമാനമെടുത്തിട്ടില്ല. കോവിഡ് ഭീഷണി നിലനിൽക്കുന്ന സാഹചര്യത്തിൽ പരീക്ഷയെഴുതാൻ കുട്ടികൾക്ക് നാട്ടിലേക്ക് വരാൻ കഴിയില്ല.  പരീക്ഷാ കേന്ദ്രങ്ങൾ അനുവദിക്കാൻ കഴിയില്ലെങ്കിൽ സ്ഥിതിഗതികൾ സാധാരണ നിലയിലാകുംവരെ പരീക്ഷ നീട്ടിവെക്കണമെന്നും ഹർജിയിൽ ആവശ്യപ്പെടുന്നുണ്ട്.