നബിദിന അവധിയും തിരുവോണവും ഒരേ ദിവസം; ആഘോഷമാക്കാനൊരുങ്ങി ഇന്ത്യൻ സമൂഹം.!

മനാമ • നബിദിന അവധിയും തിരുവോണവും ഒരേ ദിവസം തന്നെ എത്തിയതിന്റെ ആഹ്ളാദത്തിലാണ് പ്രവാസികൾ. ഈ മാസം 15 ഞായറാഴ്ച ഗൾഫ് രാജ്യങ്ങൾ നബിദിന അവധി പ്രഖ്യാപിച്ചത് ഓണം കെങ്കേമമാക്കാൻ ഒരുങ്ങുന്ന മലയാളികൾക്ക് ഇരട്ടി സന്തോഷമാണ് നൽകുന്നത്. ബഹ്റൈനിൽ ചെറുതും വലുതുമായ വിവിധ സംഘടനകളുടെ നേതൃത്വത്തിൽ നിരവധി പരിപാടികളാണ് ഓണത്തോടനുബന്ധിച്ച് അരങ്ങേറുക.
ബഹ്റൈൻ കേരളീയ സമാജത്തിൽ ഓണാഘോഷചടങ്ങുകൾക്ക് ഓഗസ്റ്റ് 30 ന് ‘പിള്ളേരോണം’ എന്ന പരിപാടിയോടെയാണ് തുടക്കമായത്. നാട്ടിൽ നിന്നും നിരവധി കലാകാരന്മാർ ആണ് അടുത്ത ദിവസങ്ങളിലായി ഓണാഘോഷ പരിപാടികളിൽ പങ്കെടുക്കാനായി ബഹ്റൈനിൽ എത്തിച്ചേരുക. പിന്നണി ഗായിക കെ. എസ്. ചിത്ര, ഗായകരായ മധു ബാലകൃഷ്ണൻ, ജി. വേണുഗോപാൽ തുടങ്ങി ചലച്ചിത്ര പിന്നണി ഗാന രംഗത്ത് നിര സാന്നിധ്യമായ നിരവധി കലാകാരന്മാർ ശ്രാവണത്തിനു മാറ്റ് കൂട്ടാൻ ബഹ്റൈൻ കേരളീയ സമാജത്തിൽ എത്തിച്ചേരുന്നുണ്ട്. 20 തോളം കലാപരിപാടികൾ തുടർച്ചയായ ദിവസങ്ങളിൽ ഇവിടെ നടക്കുന്നത് കൊണ്ട് തന്നെ അത് കഴിഞ്ഞുള്ള ദിവസങ്ങളാണ് മറ്റു സംഘടനകളുടെ ഓണാഘോഷങ്ങൾ സംഘടിപ്പിച്ചിട്ടുള്ളത്.

ബഹ്റൈനിലെ തുണിക്കടകൾ എല്ലാം പ്രത്യേക ഓണപ്പുടവകളുമായി അലങ്കരിച്ചു കഴിഞ്ഞു ഓണം വസ്ത്ര വിപണിയിൽ തന്നെയാണ് വ്യാപാരികൾ കണ്ണും നട്ടിരിക്കുന്നത്. നാട്ടിൽ നിന്ന് പ്രത്യേകം കസവുകളും കേരളാ വേഷങ്ങളും വിപണിയിൽ സജീവമായിക്കഴിഞ്ഞു. കഥകളിയും മയിൽപ്പീലിയും മുതൽ മ്യൂറൽ ആർട്ടിന്റെ വൈവിധ്യമാർന്ന കേരളത്തനിമയുള്ള വസ്ത്രങ്ങളാണ് ഇത്തവണ വിപണിയിൽ എത്തിയിട്ടുള്ളത്. മലയാളികൾക്കൊപ്പം തന്നെ മറ്റ് സംസ്ഥാനക്കാരും,സ്വദേശികളും ഓണവിപണിയെ കൗതുകത്തോടെയാണ് നോക്കിക്കാണുന്നത്.