തല മുണ്ഡനം ചെയ്ത് പ്രതിഷേധം ; ലതിക സുഭാഷിന്റെ നിര്‍ണായക തീരുമാനം ഇന്ന്

കൊച്ചി : സ്ഥാനാര്‍ത്ഥിത്വം നിഷേധിച്ചതിനെ തുടര്‍ന്ന് കെപിസിസി ആസ്ഥാനത്ത് തല മുണ്ഡനം ചെയ്ത് പ്രതിഷേധിച്ച് പാര്‍ട്ടി വിട്ട മഹിളാ കോണ്‍ഗ്രസ് അധ്യക്ഷ ലതിക സുഭാഷ് ഇന്ന് നിര്‍ണായക തീരുമാനം പ്രഖ്യാപിച്ചേക്കും.
ഏറ്റുമാനൂരില്‍ സ്വതന്ത്ര്യയായി മത്സരിക്കുന്ന കാര്യം തള്ളാതെയാണ് ലതിക സുഭാഷിന്റെ പ്രതികരണം. ഏറ്റുമാനൂരില്‍ സീറ്റ് ലഭിച്ചില്ലെങ്കില്‍ മറ്റൊരു സീറ്റില്‍ മത്സരിക്കില്ലെന്ന് ലതിക സുഭാഷ് നേരത്തെ കോണ്‍ഗ്രസ് നേതൃത്വത്തെ അറിയിച്ചിരുന്നു.
കോണ്‍ഗ്രസ് ഉള്‍പ്പെടെയുള്ള പാര്‍ട്ടിക്കുള്ളിലെ സ്ത്രീകളോടുള്ള അവഗണനയില്‍ പ്രതിഷേധിച്ചാണ് താന്‍ തലമുണ്ഡനം ചെയ്തതെന്നും ലതിസുഭാഷ് പ്രതികരിച്ചു. മഹിളാ കോണ്‍ഗ്രസ് അധ്യക്ഷമാര്‍ പൊതുവെ സ്ഥാനാര്‍ത്ഥിത്വത്തില്‍ പരിഗണിക്കപ്പെടാറുണ്ടെങ്കിലും ലതിക സുഭാഷ് ഒഴിവാക്കപ്പെടുകയായിരുന്നെന്നും വിഎസിനെതിരെ ഉള്‍പ്പെടെ മത്സരിച്ചിട്ടുള്ള ആളാണ് താനെന്നും ലതിക സുഭാഷ് പറഞ്ഞു.
മഹിളാ കോണ്‍ഗ്രസ് ദേശീയ നേതാവിന്റെതുള്‍പ്പെടെ താന്‍ നല്‍കിയ പേരുകളൊന്നും കോണ്‍ഗ്രസ് പരിഗണിച്ചില്ലെന്നും കെപിസിസി നേതാക്കള്‍ തന്റെ ഫോണ്‍കോളുകള്‍ പോലും എടുത്തിരുന്നില്ലെന്നും ലതിക സുഭാഷ് പറഞ്ഞു.