തമിഴ് നാട്ടിൽ നിന്നും തൃശ്ശൂരിലേക്ക് 2000 മെഗാവാട്ട് വൈദ്യുതി ; അടുത്ത മാസം പൂർത്തിയാക്കും

കേന്ദ്രപൊതുമേഖലാ സ്ഥാപനമായ പവർഗ്രിഡ് കോർപ്പറേഷന്റെ നേതൃത്വത്തിലാണ് പദ്ധതി നടപ്പാക്കിയത്. ഛത്തീസ്ഗഡിലെ റായ്ഗഡിൽ നിന്നാണ് വൈദ്യുതി എത്തിക്കുക.
അതിനൂതന സാങ്കേതിക വിദ്യയായ വോൾട്ടേജ് സോഴ്‌സ് കൺവർട്ടർ അടിസ്ഥാനമാക്കി നിർമ്മിക്കുന്ന രാജ്യത്തെ ആദ്യപ്രസരണ ശൃംഖലയാണ് പുഗലൂർ-മാടക്കത്തറ എച്ച്.വി.ഡി.സി സംവിധാനം. പ്രസരണ നഷ്ടം പരമാവധി കുറയ്ക്കാൻ ഹൈവോൾട്ടേജ് ഡയറക്ട് കറന്റ് സാങ്കേതിക വിദ്യയ്ക്ക് സാധിക്കും. പദ്ധതിയിൽ 138 കിലോമീറ്റർ ഓവർഹെഡ് ലൈനും വടക്കാഞ്ചേരി മുതൽ മാടക്കത്തറവരെ 27 കിലോമീറ്റർ ഭൂഗർഭ കേബിളുമാണുള്ളത്. സ്ഥലം ഉടമകളുടെ എതിർപ്പിൽ ലൈൻ നിർമ്മാണം തടസപ്പെടുന്നത് ഒഴിവാക്കാൻ ഭൂമിക്ക് സ്‌പെഷ്യൽ പാക്കേജിലൂടെ നഷ്ടപരിഹാരം ഉറപ്പാക്കിയാണ് പദ്ധതി നടപ്പാക്കിയത്. 2018 മെയ് മാസത്തിൽ ആരംഭിച്ച പദ്ധതി സമയബന്ധിതമായി പൂർത്തിയാക്കാൻ കെ.എസ്.ഇ.ബി പ്രത്യേക കർമ്മസേനയെ നിയോഗിച്ചിരുന്നു. കോവിഡ് പ്രതിരോധ പ്രവർത്തനങ്ങളുടെ ഭാഗമായുണ്ടായ ഗതാഗത നിയന്ത്രണ സാഹചര്യം പ്രയോജനപ്പെടുത്തി കുതിരാൻ തുരങ്കത്തിലുൾപ്പെടെ ദേശീയ പാതയുടെ പാർശ്വങ്ങളിൽ കേബിളുകൾ സ്ഥാപിക്കാനായത് നേട്ടമായി. സംസ്ഥാന സർക്കാരിന്റെ ആവശ്യപ്രകാരമാണ്  റായ്ഗഡിൽ നിന്നും പുഗലൂർ വരെയുള്ള 800 കെ.വി ഡി.സി ലൈനിന്റെ തുടർച്ചയായി 320 കെ.വി എച്ച്.വി.ഡി.സി ലൈൻ അനുവദിച്ചത്.

ലൈൻ നിർമ്മാണത്തിന്റെ അവസാനഘട്ട  പ്രവൃത്തികളാണ് നടക്കുന്നത്. ഗാർഹിക ആവശ്യങ്ങൾക്കൊപ്പം വ്യവസായ സ്ഥാപനങ്ങൾക്കാവശ്യമായ വൈദ്യുതിയും പദ്ധതിയിലൂടെ ലഭ്യമാക്കും. കൊച്ചി- ബംഗളൂരു വ്യവസായ ഇടനാഴിയുടെ ഭാഗമായി ആരംഭിക്കുന്ന വ്യവസായ സംരംഭങ്ങൾക്ക് തടസ്സമില്ലാതെയുള്ള വൈദ്യുതി വിതരണത്തിനും പുഗലൂർ-മാടക്കത്തറ ലൈൻ സഹായകമാകും.