ഡിജിറ്റലായതോടെ ദുബായ് ആർടിഎയ്ക്ക് മികച്ച വരുമാന വർധന

ദുബായ് : ആർടിഎയുടെ സേവനങ്ങൾ ഡിജിറ്റലാക്കിയതോടെ കഴിഞ്ഞ വർഷം ലഭിച്ചതു 442.7 കോടി ദിർഹം വരുമാനം. മുൻ വർഷത്തെക്കാൾ 16% അധിക വരുമാനമാണിത്. ഡിജിറ്റൽ ചാനലുകളിലൂടെയുള്ള ഇടപാടുകൾ 67.96 കോടി കടന്നു. ഇതിൽ 1.34 കോടി ഇടപാടുകൾ ആർടിഎയുടെ സ്മാർട്ട് ആപ്ലിക്കേഷനുകൾ വഴിയാണ്. റജിസ്ട്രേഡ് ഉപയോക്താക്കളുടെ എണ്ണം 19.4 ലക്ഷമായി വർധിച്ചു. സ്മാർട്ട് ആപ്പിലൂടെ നൽകിയ പാർക്കിങ് ടിക്കറ്റുകളുടെ എണ്ണം 2.99 കോടിയായി. നിർമിതബുദ്ധിയുടെ സഹായത്തോടെ ആർടിഎ സേവനങ്ങൾ മികച്ച നിലയിൽ ഉറപ്പാക്കുകയാണ് അടുത്ത ലക്ഷ്യമെന്ന് ആർടിഎ ഡയറക്ടർ ജനറൽ മാത്തർ അൽ തായർ പറഞ്ഞു. ഡ്രൈവർ, വാഹന ലൈസൻസുകൾ ആർടിഎ ആപ്പിൽ സൂക്ഷിക്കുന്ന സേവനത്തിനും തുടക്കമായി. മെട്രോ, ട്രാം സ്റ്റേഷനുകളിൽ വാണിജ്യ ആവശ്യങ്ങൾക്കായി സ്ഥലം വാടകയ്ക്കു നൽകുന്നതിനും നോൾ കാർഡ് സേവനങ്ങൾക്കും ഓൺലൈൻ പണമിടപാടുകൾക്കും ആർടിഎയുടെ ഡിജിറ്റൽ പ്ലാറ്റ്ഫോം ഉപയോഗിക്കാം.