ചോര്‍ന്നതോ ചോര്‍ത്തിയതോ ; ബിജെപി വോട്ട് ഇത്തവണ കുത്തനെ ഇടിഞ്ഞു, തെരഞ്ഞെടുപ്പ് തോല്‍വി പഠിക്കാന്‍ സമിതി

ഇത്തവണ ബിജെപിയുടെ വോട്ട് വിഹിതം 11.30 ശതമാനം മാത്രമായി കുറഞ്ഞു. 2016 ഇല്‍ ഇത് 15.01 ശതമാനമായിരുന്നു. 2019ലെ ലോക്‌സഭാ തെരഞ്ഞെടുപ്പില്‍ കിട്ടിയത് 15.53 ശതമാനമായിരുന്നു. ഇക്കഴിഞ്ഞ തദ്ദേശ തെരഞ്ഞെടുപ്പില്‍ ലഭിച്ചത് 15.56 ശതമാനവും. സമീപകാലത്തെ എല്ലാ തെരഞ്ഞെടുപ്പിനെക്കാളും കുറഞ്ഞുവോട്ടുകളാണിത് നിയമസഭ തെരഞ്ഞെടുപ്പില്‍ കിട്ടിയത്

തിരുവനന്തപുരം : സിറ്റിങ് സീറ്റായ നേമം പോയതിന്റെ കനത്ത തിരിച്ചടിക്കപ്പുറം സംസ്ഥാനത്ത് ബിജെപിയുടെ വോട്ട് ശതമാനവും ഇത്തവണ കുത്തനെ ഇടിഞ്ഞു. ഇത്തവണ ബിജെപിയുടെ വോട്ട് വിഹിതം 11.30 ശതമാനം മാത്രമായി കുറഞ്ഞു. 2016 ഇല്‍ ഇത് 15.01 ശതമാനമായിരുന്നു. 2019ലെ ലോക്‌സഭാ തെരഞ്ഞെടുപ്പില്‍ കിട്ടിയത് 15.53 ശതമാനമായിരുന്നു. ഇക്കഴിഞ്ഞ തദ്ദേശ തെരഞ്ഞെടുപ്പില്‍ ലഭിച്ചത് 15.56 ശതമാനവും. സമീപകാലത്തെ എല്ലാ തെരഞ്ഞെടുപ്പിനെക്കാളും കുറഞ്ഞുവോട്ടുകളാണിത്. രണ്ടാം കക്ഷിയായ ബിഡിജെഎസിനും മത്സരിച്ച എല്ലായിടത്തും വോട്ട് ഇടിഞ്ഞു. കോന്നിയില്‍ ഉപതെരഞ്ഞെടുപ്പിനെക്കാള്‍ 6975 വോട്ടുകള്‍ കുറഞ്ഞാണ് കെ സുരേന്ദ്രന്‍ ദയനീയമായി മൂന്നാമതെത്തിയത്.

സീറ്റെണ്ണം ചോദിക്കുമ്പോഴോക്കെ കൂടുതല്‍ വോട്ട് ലഭിക്കുമെന്ന് പറഞ്ഞായിരുന്നു ഇതുവരെ കെ.സുരേന്ദ്രനും നേതാക്കളും പിടിച്ചുനിന്നത്. ദേശീയനേതാക്കള്‍ പറന്നിറങ്ങിയിട്ടും മോദിയുടെ പേരില്‍ വോട്ട് തേടിയിട്ടും ഇത്തവണ ബിജെപിയുടെ വോട്ട് കുത്തനെ ഇടിഞ്ഞു. സിറ്റിംങ് സീറ്റ് നഷ്ടപ്പെട്ടതിനൊപ്പം വോട്ട് ശതമാനത്തിലെ കുറവുണ്ടായത് സംബന്ധിച്ച എങ്ങിനെ ദേശീയ നേതൃത്വത്തോട് വിശദീകരിക്കുമെന്ന ആശങ്കയിലാണ് കെ സുരേന്ദ്രനും സംസ്ഥാന നേതൃത്വവും.

ബിജെപി പ്രതീക്ഷവെച്ച മണ്ഡലങ്ങളില്‍ ജയസാധ്യതയുള്ള എതിര്‍സ്ഥാനാര്‍ത്ഥികള്‍ക്കായി ന്യൂനപക്ഷവോട്ട് ഏകീകരണമുണ്ടായെന്നാണ് പാര്‍ട്ടിയുടെ വിലയിരുത്തല്‍. ഒപ്പം കഴിഞ്ഞ തവണ ബിഡിജെഎസ് വഴി കിട്ടിയ ഈഴവവോട്ടുകള്‍ ഇടതിലേക്ക് തിരിച്ചുപോയതും ആഘാതമായി. വമ്പന്‍ തോല്‍വിയില്‍ സുരേന്ദ്രനുള്ള ഏക ആശ്വാസം പാര്‍ട്ടിയില്‍ കരുനീക്കം നടത്തേണ്ട കൃഷ്ണദാസും ശോഭയുമെല്ലാം കൂട്ടത്തോടെ തോറ്റു എന്നത് മാത്രം.

ഈ സാഹചര്യത്തില്‍ നിയമസഭാ തെരഞ്ഞെടുപ്പ് തോല്‍വി പഠിക്കാനായി സമിതി രൂപീകരിക്കാന്‍ ബിജെപി. ഓണ്‍ലൈനായി ചേര്‍ന്ന കോര്‍ കമ്മിറ്റി യോഗം തീരുമാനിച്ചു. തെരഞ്ഞെടുപ്പില്‍ വീഴ്ച ഉണ്ടായെന്നാണ് ബിജെപിയുടെ വിലയിരുത്തല്‍. ബിഡിജെഎസിനെതിരെയും യോഗത്തില്‍ വിമര്‍ശനം ഉയര്‍ന്നു. ബിഡിജെഎസ് തെരഞ്ഞെടുപ്പില്‍ മുന്നേറ്റം ഉണ്ടാക്കിയില്ലെന്നാണ് വിമര്‍ശനം.