ഖരീഫ് സീസണിനുള്ള സുരക്ഷാ ഒരുക്കങ്ങൾ പൂർത്തിയായി: സിവിൽ ഡിഫൻസ് അതോറിറ്റി

സലാല : ഖരീഫ് കാലത്തിന്റെ തുടക്കത്തോടെ സലാലയിലേക്ക് സഞ്ചാരികളുടെ ഒഴുക്ക് വർധിച്ചിരിക്കുകയാണ്. സന്ദർശകരുടെ സുരക്ഷ ഉറപ്പാക്കാൻ സിവിൽ ഡിഫൻസ് ആൻഡ് ആംബുലൻസ് അതോറിറ്റി എല്ലാ മുന്നൊരുക്കങ്ങളും പൂർത്തിയാക്കിയതായി അറിയിച്ചു.

സുരക്ഷ ഉറപ്പാക്കുന്നതിന്റെ ഭാഗമായി, സഞ്ചാരികളും ഖരീഫ് പ്രവർത്തനങ്ങളിൽ ഏർപ്പെട്ടിരിക്കുന്ന സ്ഥാപനങ്ങളും നിർബന്ധമായും സുരക്ഷാ മാനദണ്ഡങ്ങൾ പാലിക്കണം എന്ന മുന്നറിയിപ്പ് അധികൃതർ നൽകിയിട്ടുണ്ട്.

ദാഖിലിയ, ദാഹിറ, അൽ വുസ്ത ഗവർണറേറ്റുകളിൽ നിന്ന് ദോഫാർ ഭാഗത്തേക്ക് യാത്ര ചെയ്യുന്ന റോഡുകളിൽ അപകടങ്ങൾ ഉണ്ടാകാനുള്ള സാഹചര്യം കണക്കിലെടുത്ത്, പുതിയ കൺട്രോൾ പോയിന്റുകൾ സ്ഥാപിച്ചിട്ടുണ്ട്.

• തീരദേശ പാതയിൽ, തെക്കൻ ശർഖിയയെ അൽ വുസ്ത, ദോഫാർ ഗവർണറേറ്റുകളുമായി ബന്ധിപ്പിക്കുന്ന പ്രദേശത്ത് രണ്ട് കൺട്രോൾ പോയിന്റുകൾ
• ദാഖിലിയ – ദാഹിറ – ദോഫാർ റൂട്ടിൽ അഞ്ച് കൺട്രോൾ പോയിന്റുകൾ

ഇവയൊക്കെയും ആപത്‌കാലങ്ങളിൽ സഹായകരമാകുമെന്ന് അതോറിറ്റി വ്യക്തമാക്കി.