കൈവിടാതെ കൂടെയുണ്ട്; ഗാസയ്ക്ക് യുഎഇയുടെ വലിയ സഹായം.

അബുദാബി : ഗാസയിലേക്കുള്ള യുഎഇയുടെ ഏറ്റവും വലിയ സഹായ കപ്പൽ ഈജിപ്തിലെ അൽ അരിഷ് തുറമുഖത്തെത്തി. ഭക്ഷണവും മരുന്നും ഉൾപ്പെടെ 5,800 ടണ്ണിലധികം അവശ്യവസ്തുക്കളാണ് അൽ അരീഷിൽനിന്ന് ലോറികളിൽ ഗാസയിൽ എത്തിച്ച് വിതരണം ചെയ്യുക. 2023 ഒക്ടോബറിൽ യുദ്ധം ആരംഭിച്ചതു മുതൽ യുഎഇ നടപ്പാക്കിവരുന്ന കാരുണ്യപദ്ധതിയായ ഓപ്പറേഷൻ ഗാലന്റ് നൈറ്റ് 3 പ്രകാരമാണിത്. ഇതുവരെ അയച്ചതിലെ ഏഴാമത്തേതും ഏറ്റവും വലുതുമായ സഹായമാണിത്.
ഭക്ഷ്യക്ഷാമം, ആരോഗ്യസേവനങ്ങളുടെ അപര്യാപ്തത എന്നിവ കാരണം ദുരിതജീവിതം നയിക്കുന്ന ഗാസക്കാരെ സഹായിക്കുന്നതിൽ യുഎഇ നിർണായക പങ്കുവഹിക്കുന്നുണ്ടെന്ന് ദാർ അൽ ബിർ സൊസൈറ്റി എക്സിക്യൂട്ടീവ് ഡയറക്ടർ അബ്ദുല്ല അൽ ഫലാസി പറഞ്ഞു. ഗാസയിലെ ദുരിതബാധിതർക്ക് 1.4 കോടി ദിർഹത്തിന്റെ മരുന്ന് സൊസൈറ്റി സംഭാവന ചെയ്തിരുന്നു. 
വ്രതാരംഭത്തിനു മുന്നോടിയായി ഫെബ്രുവരിയിൽ 300 ടൺ ഭക്ഷ്യവസ്തുക്കൾ വിമാനമാർഗം യുഎഇ ഗാസയിൽ എത്തിച്ചിരുന്നു. ഗാസയിലെ സഹോദരങ്ങൾക്കു സഹായമെത്തിക്കാനുള്ള ശ്രമങ്ങൾ തുടരുമെന്ന് ഓപ്പറേഷൻ ഗാലന്റ് നൈറ്റ് 3 ക്യാംപെയ്ൻ വക്താവ് മുഹമ്മദ് അൽ ഷരീഫ് പറഞ്ഞു. 2023ൽ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നിർദേശത്തെ തുടർന്ന്, എമിറേറ്റ്സ് റെഡ് ക്രസന്റിന്റെയും യുഎഇയിലെ മാനുഷിക, ജീവകാരുണ്യ സ്ഥാപനങ്ങളുടെയും സഹകരണത്തോടെയാണ് ഓപ്പറേഷൻ ഗാലന്റ് നൈറ്റ് 3 ആരംഭിച്ചത്. ഇതുവരെ 600 വിമാനങ്ങൾ, 7 കപ്പലുകൾ, 3,500 ലോറികൾ എന്നിവയിലായി 65,000 ടണ്ണിലധികം ദുരിതാശ്വാസ സാമഗ്രികൾ ദുരിതബാധിതർക്കായി എത്തിച്ചിട്ടുണ്ട്. അതിനുപുറമെ എയർ ഡ്രോപ് ഓപ്പറേഷൻ വഴി 3,700 ടണ്ണിലധികം സാധനങ്ങൾ വിദൂര മേഖലകളിലും എത്തിച്ചിരുന്നു.