ഉപയോഗിച്ച മൊബൈയിൽ ഫോണുകൾ അറ്റകുറ്റപണികൾ നടത്തി പുതിയതാണെന്ന വ്യാജേനെ വിൽപന നടത്തുന്ന സംഘം പിടിയിൽ

ഉപയോഗിച്ച മൊബൈയിൽ ഫോണുകൾ അറ്റകുറ്റപണികൾ നടത്തി പുതിയതാണെന്ന വ്യാജേനെ വിൽപന നടത്തുന്ന സംഘം പിടിയിൽ

കുവൈറ്റ് സിറ്റി : ഒരിക്കൽ ഉപയോഗിച്ച മൊബൈൽ ഫോണുകൾ അറ്റകുറ്റപണികൾ നടത്തി പുതിയ ഫോൺ എന്ന വ്യാജേന വിൽപന നടത്തുന്ന സംഘം പിടിയിലായി. ഉപയോഗിച്ച ഫോണുകൾ അതേ ബ്രാൻഡിന്റെ പെട്ടിയിൽ പാക്ക് ചെയ്ത് വിൽക്കുന്ന രീതിയാണു സംഘം തട്ടിപ്പിനായി സ്വീകരിച്ചിരുന്നത്.

വാണിജ്യ-വ്യവസായ മന്ത്രാലയത്തിലെ ഉദ്യോഗസ്ഥരുടെ നേതൃത്വത്തിൽ റെയ്ഡ് നടത്തിയാണു തട്ടിപ്പ്‌ സംഘത്തെ പിടി കൂടിയത്‌. ഈ ഫോണുകൾ ചില കടകളിൽ പ്രദർശനത്തിനു വെച്ച്‌ പുതിയ ഫോണുകൾ എന്ന വ്യാജേനയായിരുന്നു ഉപഭോക്താക്കളെ കബളിപ്പിച്ചത്‌. രഹസ്യ വിവരം ലഭിച്ചതിന്റെ അടിസ്ഥാനത്തിൽ നിരവധി ദിവസം നിരീക്ഷണം നടത്തിയ ശേഷമാണ് സ്ഥാപനത്തിൽ റെയ്ഡ് നടത്തിയത്‌.

ഇവിടെ നിന്നും ഇത്തരത്തിൽ വൻതോതിൽ ഫോണുകൾ പിടിച്ചെടുത്തു. ഇവരിൽ നിന്നും ഈ ഫോണുകൾ വാങ്ങി വിൽപ്പന നടത്തുന്ന മൊബെയിൽ ഫോൺ കടകളിൽ പരിശോധന നടത്താനും മന്ത്രാലയം തയ്യാറെടുക്കുകയാണ്. ഇതിന്റെ മുന്നോടിയായി മന്ത്രാലയത്തിലെ ഉദ്യോഗസ്ഥർ നിലവിൽ കമ്പനിയുടെ ഇൻവോയ്സുകൾ സൂക്ഷ്മമായി നിരീക്ഷിച്ചു വരികയാണ്. ഇതിനു ശേഷം തുടർ നടപടികളുമായി മുന്നോട്ട്‌ പോകുവാനാണു മന്ത്രാലയം തീരുമാനിച്ചിരിക്കുന്നത്