ഈദുൽ ഫിത്ർ പ്രമാണിച്ച് പ്രത്യേക നിരക്ക് ഇളവുമായി ജിദ്ദ ട്രാൻസ്‌പോർട്ട് കമ്പനി സീ ടാക്‌സി.

ജിദ്ദ : ജിദ്ദ ട്രാൻസ്‌പോർട്ട് കമ്പനി സീ ടാക്‌സി നിരക്കുകളിൽ ഈദുൽ ഫിത്ർ പ്രമാണിച്ച് പ്രത്യേക നിരക്ക് ഇളവ് പ്രഖ്യാപിച്ചു. ടിക്കറ്റ് നിരക്ക് 25 റിയാലായാണ് കുറച്ചത്. ജിദ്ദ യാച്ച് ക്ലബിനെയും ഹിസ്റ്റോറിക് ജിദ്ദ ഡിസ്ട്രിക്റ്റിനെയും ബന്ധിപ്പിക്കുന്ന കടൽ ടാക്‌സി റൂട്ടിൽ മാർച്ച് 23 മുതൽ ഏപ്രിൽ 3 വരെ കുറഞ്ഞ നിരക്കിൽ യാത്ര ചെയ്യാം.
മുൻപ് റമസാനിൽ 25 റിയാൽ മുതൽ 50 റിയാൽ വരെയായിരുന്നു നിരക്ക്. 10 വയസ്സിനു താഴെയുള്ള കുട്ടികൾക്ക് സൗജന്യമായി യാത്ര ചെയ്യാം. നഗരത്തിലെ ഗതാഗത അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും സമുദ്ര ടൂറിസം പ്രോത്സാഹിപ്പിക്കുന്നതിനുമുള്ള വിപുലമായ പദ്ധതിയുടെ ഭാഗമാണ് ഈ സംരംഭം.
പ്രതിദിനം 29,000 യാത്രക്കാരെ ഉൾക്കൊള്ളുന്ന 20 ആധുനിക കടൽ ടാക്‌സി സ്റ്റേഷനുകൾ വികസിപ്പിക്കാനുള്ള പദ്ധതികൾ ജിദ്ദ മേയർ സലേഹ് അൽ തുർക്കി നേരത്തെ പ്രഖ്യാപിച്ചിരുന്നു. റോഡിലെ തിരക്ക് കുറയ്‌ക്കാൻ സഹായിക്കുന്ന ഒബുറിന്റെ വാട്ടർഫ്രണ്ടും ജിദ്ദയുടെ മധ്യ-വടക്കൻ ജില്ലകളും തമ്മിലുള്ള കണക്റ്റിവിറ്റി വർധിപ്പിക്കുകയാണ് സ്റ്റേഷനുകളുടെ ലക്ഷ്യം.