അയല്‍വീട്ടിലെ നായകടിച്ച വിദ്യാര്‍ത്ഥിനി മരിച്ചു

പേ വിഷബാധയേറ്റ വിദ്യാര്‍ത്ഥിനി ചികിത്സയിലിരിക്കെ മരണമടഞ്ഞു നായയുടെ കടിയേറ്റ മറ്റു ചിലരും നിരീക്ഷണത്തില്‍

പാലക്കാട് :  അയല്‍ വീട്ടിലെ നായയുടെ കടിയേറ്റ ബിരുദ വിദ്യാര്‍ത്ഥിനി പേവിഷബാധയേറ്റ് മരിച്ചു. കഴിഞ്ഞ മാസം 30 ന് കോളേജിലേക്ക് പോകും വഴി അയല്‍വീട്ടിലെ നായ കടിക്കുകയായിരുന്നു. പാലക്കാട് മങ്കര സ്വദേശി സുഗുണന്റെ മകള്‍ ശ്രീലക്ഷ്മി (19) ആണ് മരണമടഞ്ഞത്.

നായകടിച്ചതിനെ തുടര്‍ന്ന് ആരോഗ്യ വകുപ്പ് പറഞ്ഞതു പ്രകാരം കുത്തിവെപ്പുകള്‍ കൃത്യമായി എടുത്തിരുന്നു.

എന്നാല്‍, കഴിഞ്ഞ ദിവസം അസ്വസ്ഥത പ്രകടിപ്പിച്ച ശ്രീലക്ഷ്മിയെ സ്വകാര്യ ക്ലിനിക്കില്‍ പ്രവേശിപ്പിച്ചിരുന്നു. എന്നാല്‍ പേ വിഷബാധയുടെ ലക്ഷണങ്ങള്‍ പ്രകടിപ്പിച്ചതോടെ ശ്രീലക്ഷ്മിയെ തൃശ്ശൂര്‍ മെഡിക്കല്‍ കോളേജില്‍ പ്രവേശിപ്പിക്കുകയായിരുന്നു. എന്നാല്‍, വ്യാഴാഴ്ച പുലര്‍ച്ചെ മരണമടയുകയായിരുന്നു.

കോയമ്പത്തൂരില്‍ സ്വകാര്യ കോളേജില്‍ ബിസിഎ ഒന്നാം വര്‍ഷ വിദ്യാര്‍ത്ഥിനിയാണ് ശ്രീലക്ഷ്മി. സിന്ധു അമ്മയും സനത്, സിദ്ധാര്‍ത്ഥന്‍ എന്നിവര്‍ സഹോദരങ്ങളുമാണ്. പോസ്റ്റ്‌മോര്‍ട്ടത്തിനു ശേഷം മൃതദേഹം സംസ്‌കരിച്ചു.

നാലു വാക്‌സിന്‍ എടുത്തിട്ടും വിദ്യാര്‍ത്ഥിനി മരിച്ചത് ആശങ്കപ്പെടുത്തുന്നുണ്ട്. രണ്ടു പേരേക്കുടി നായ കടിച്ചതായി അറിവുണ്ടെന്നും ഇവര്‍ നിരീക്ഷണത്തിലാണെന്നും അധികൃതര്‍ പറയുന്നു.

നായ കടിച്ച് ഏതാണ്ട് 28 ദിവസങ്ങള്‍ക്കു ശേഷമാണ് ശ്രീലക്ഷ്മിക്ക് പനി ബാധിച്ചത്. വൈറല്‍ ഫീവറെന്ന് കരുതിയാണ് ശ്രീലക്ഷ്മിയെ മങ്കരയിലെ സ്വകാര്യ ക്ലിനിക്കില്‍ പ്രവേശിപ്പിച്ചത്. എന്നാല്‍, പെട്ടെന്ന് പേ വിഷബാധയേറ്റ ലക്ഷണങ്ങള്‍ കാണിക്കുകയായിരുന്നു. തുടര്‍ന്നാണ് ആദ്യ വാക്‌സിന്‍ എടുത്ത തൃശ്ശൂര്‍ മെഡിക്കല്‍ കോളേജിലേക്ക് മാറ്റിയത്. പക്ഷേ, രോഗബാധ ഗുരുതരമായ നിലയിലെത്തുകയും മരണം സംഭവിക്കുകയുമായിരുന്നു.

സംഭവത്തെക്കുറിച്ച് അന്വേഷിക്കാന്‍ ആരോഗ്യ മന്ത്രി വീണാജോര്‍ജ് ഉത്തരവിട്ടു. പാലാക്കാട് ജില്ലാ സര്‍വലയന്‍സ് ഓഫീസറുടെ നേതൃത്വത്തില്‍ സംഭവത്തെക്കുറിച്ച് വിശദമായി അന്വേഷിക്കും.