അബുദാബിയിൽ ചൂടുകാല അപകടങ്ങൾ ഒഴിവാക്കാൻ ഭാരവാഹനങ്ങൾക്ക് ശക്തമായ പരിശോധന

അബുദാബി: ചൂടുകാല അപകടങ്ങൾ തടയാൻ ഭാരവാഹനങ്ങൾക്കായി ശക്തമായ പരിശോധന തുടങ്ങുന്നു

ചൂടുകാലത്തിൽ റോഡ് അപകടങ്ങൾ തടയുന്നതിനായുള്ള സുരക്ഷാ നടപടികൾ ശക്തമാക്കുന്നതിനായി അബുദാബിയിൽ ഭാരവാഹനങ്ങൾക്കുള്ള സമഗ്ര പരിശോധനകൾ ആരംഭിച്ചു. വാഹനങ്ങളുടെ മൊത്തത്തിലുള്ള സാങ്കേതിക അവസ്ഥയും കാലാവസ്ഥാ പ്രതിസന്ധികളോട് അതിജീവിക്കാനുള്ള യോഗ്യതയും പരിശോധിക്കുന്നതാണ്.

അബുദാബി പൊലീസ്, താഖ ഡിസ്ട്രിബ്യൂഷൻ (ജല, വൈദ്യുതി വിതരണ കമ്പനി), എന്നിവയുമായി സഹകരിച്ചാണ് ഇന്റഗ്രേറ്റഡ് ട്രാൻസ്പോർട്ട് സെന്റർ ഈ പരിശോധനകൾക്കു നേതൃത്വം നൽകുന്നത്. അനുമതിയില്ലാതെ അധിക ഭാരം കയറ്റി റോഡിൽ ഇറങ്ങുന്ന വാഹനങ്ങൾ ലക്ഷ്യമിടുകയാണ്.

പുതിയ സ്മാർട്ട് ടെക്‌നോളജിയിലൂടെയാണ് നിയമലംഘകരെ തിരിച്ചറിയുന്നത്. അധികപുക പുറത്തേക്കുവിടുന്ന വാഹനങ്ങൾ തത്സമയം പിടികൂടുന്നതിന് സ്മാർട്ട് സെൻസറുകളും നിരീക്ഷണ സംവിധാനങ്ങളും റോഡുകളിൽ നിലവിലുണ്ട്.

24 മണിക്കൂറും പ്രവർത്തിക്കുന്ന ഈ സംവിധാനം പ്രധാന റോഡുകളിലും ഇന്റർചേഞ്ചുകളിലും തുരങ്ക പാതകളിലും ഗതാഗതക്കുരുക്കുകൾ ഉണ്ടാകുന്ന സാഹചര്യം അടിയന്തിരമായി തിരിച്ചറിയുകയും സഹായം എത്തിക്കുകയും ചെയ്യാനാകും. കാലാവസ്ഥാ വ്യതിയാനങ്ങൾ കാരണം ഗതാഗത തടസ്സങ്ങൾ ഉണ്ടാകുമെന്ന പ്രതീക്ഷയുണ്ടെങ്കിൽ, അത് മുൻകൂട്ടി അറിയിച്ചുകൊണ്ട് ബദൽ മാർഗങ്ങൾ തുറക്കാനും ഈ സംവിധാനത്തിന് കഴിയും.

വാഹനാപകടങ്ങൾ കുറയ്ക്കുന്നതിന് പുറമേ, തകരാറിലായ വാഹനങ്ങൾ ഉടൻ നന്നാക്കി റോഡിൽ നിന്നും മാറ്റുന്നതിനുള്ള സൗജന്യ സഹായസേവനവും ഇന്റഗ്രേറ്റഡ് ട്രാൻസ്പോർട്ട് സെന്റർ 24 മണിക്കൂറും നൽകുന്നുണ്ട്.

ഈ സംയുക്ത പ്രവർത്തനത്തിലൂടെ അബുദാബിയിലെ റോഡ് സുരക്ഷയും ഗതാഗത സേവനങ്ങളുമെല്ലാം കൂടുതൽ ദൃഢമാകുമെന്ന പ്രതീക്ഷയിലാണ് അധികൃതർ.